చాన్నాళ్ళ తరువాత ఎట్టకేలకు ఓ సూపర్ హిట్ అందుకున్నాడు డాషింగ్ డైరెక్టర్ పూరి జగన్నాథ్. ‘ఇస్మార్ట్ శంకర్’ చిత్రంతో హిట్టు మాత్రమే కాదు మాస్ హిట్ కొట్టాడు. చాక్లెట్ బాయ్ ఇమేజ్ ఉన్న రామ్ ను ఊర మాస్ గా చూపించి అతని ఎనర్జెటిక్ స్టార్ ఇమేజ్ ను మరింత పెంచాడు. ప్రస్తుతం ‘ఇస్మార్ట్ శంకర్’ సక్సెస్ ను ఎంజాయ్ చేస్తున్న పూరి.. తన తరువాతి సినిమా పనుల్లో కూడా బిజిగా ఉన్నాడని సమాచారం. ఇక తన డ్రీమ్ ప్రాజెక్ట్ అయిన ‘జనగణమన’ ను తెరకెక్కించాలని పూరి భావిస్తున్నాడట. మొదట ఈ చిత్రాన్ని మహేష్ బాబుతో తెరకెక్కించాలని అనుకున్నా.. ఎందుకో కుదర్లేదు.
ఇటీవల పూరి ఇచ్చిన ఇంటర్వ్యూ ప్రకారం… మహేష్ తో సినిమా చేసే అవకాశం లేదని స్పష్టమవుతుంది. ఈ క్రమంలో ‘జనగణమణ’ చిత్రాన్ని ఎవరితో తెరకెక్కిస్తాడా అనేది ఆసక్తికరంగా మారింది. ఈ నేపథ్యంలో విజయ్ దేవరకొండ పేరు ఎక్కువ వినిపిస్తుంది. ఈ వార్త నిజమో కాదో తెలీదు కానీ విజయ్ ఫ్యాన్స్ మాత్రం ఈ విషయాన్ని సోషల్ మీడియాలో తెగ వైరల్ చేస్తున్నారు. నిజానికి ‘ఇస్మార్ట్ శంకర్’ చిత్రాన్ని మొదట విజయ్ దేవరకొండతోనే తెరకెక్కించాలని పూరి భావించాడు. కానీ అప్పటికి ‘డియర్ కామ్రేడ్’ చిత్రంతో బిజీగా ఉండడం.. అలాగే ఆ చిత్రంతో పాటు మరో రెండు చిత్రాలకి విజయ్ కమిట్మెంట్ ఇవ్వడంతో ఇవి పూర్తయ్యాక కచ్చితంగా చేస్తానని విజయ్.. పూరి కి మాటిచ్చాడట. ఒకవేళ అన్నీ అనుకున్నట్టు అయితే.. ‘జనగణమణ’ విజయ్ చేసే అవకాశం ఉందని ఫిలింనగర్లో గుసగుసలు వినిపిస్తున్నాయి.
