ఈ వారం ప్రేక్షకుల ముందుకు వస్తున్న చిన్న సినిమాల్లో ‘పురుషః’ ఒకటి. హీరో, హీరోయిన్లు తప్ప మిగిలిన తారాగణం అంతా పెద్దదే. రాజ్ కుమార్ కసిరెడ్డి, సప్తగిరి, వీటీవీ గణేష్, వెన్నెల కిషోర్ వంటి హ్యాపెనింగ్ ఆర్టిస్టులంతా ఉండటంతో ప్రేక్షకుల దృష్టి ఈ సినిమాపై పడింది అని చెప్పాలి. టీజర్, ట్రైలర్ వంటివి కూడా క్వాలిటీగా అనిపించాయి. మరి సినిమా ఎంతవరకు మెప్పించింది అనేది తెలుసుకుందాం రండి:
కథ: గోవింద్(పవన్ కళ్యాణ్ బత్తుల) ఓ ఫ్యామిలీ థెరపిస్ట్. భార్యా భర్తల మధ్య గొడవలు కనుక వస్తే.. వాళ్ళు విడాకుల వరకు వెళ్లకుండా కౌన్సిలింగ్ ఇస్తూ ఉంటాడు. మరోవైపు అతని భార్య కమలతో(వైష్ణవి కొక్కుర) హ్యాపీగా ఫ్యామిలీ లైఫ్ ను లీడ్ చేస్తూ ఉంటాడు. అయితే అతని ప్రాణస్నేహితులు థామస్(సప్తగిరి) జంప్(రాజ్ కుమార్ కసిరెడ్డి) మాత్రం తమ భార్యలతో గొడవలు పడుతూ ఉంటారు. వాళ్ళ కారణంగా గోవింద్ ఒకరోజు మందు తాగి ఇంటికి వెళ్తాడు. మద్యం మత్తులో భార్య వద్ద ఫస్ట్ లవ్..ని బయటపెట్టేస్తాడు.దీంతో భర్తతో పెద్ద గొడవ అవుతుంది. ఆమెను కూల్ చేసేందుకు మరో స్నేహితుడు కిస్సు(వెన్నెల కిషోర్) పెళ్ళికి తీసుకువెళ్తాడు. కిస్సు ప్రతి మెమొరీని డైరీలో పిక్చర్ రూపంలో చిత్రీకరించి దాచుకుంటూ ఉంటాడు.గోవింద్, థామస్,జంప్..లు యవ్వనంలో చేసిన చిలిపి పనులకి సంబంధించిన మెమోరీస్ కూడా ఆ డైరీలో ఉంటాయి. ఇవి కాస్త వీళ్ళ భార్యల కంట పడతాయి. దీంతో విడాకులు తీసుకునే రేంజ్..కి వెళ్తుంది విషయం. ఆ తర్వాత ఏమైంది? ఈ ముగ్గురూ తమ భార్యలతో ఎలా కలిశారు? అనేది మిగిలిన కథ.
నటీనటుల పనితీరు: పవన్ కళ్యాణ్ బత్తుల కొత్త కుర్రాడు. అతని లుక్స్ కొన్ని సీన్స్ లో బాగున్నాయి. అయితే మరీ ‘అతి’కి పోకుండా సెటిల్డ్ గా పెర్ఫార్మ్ చేసిన తీరు అభినందనీయం. హీరోయిన్ వైష్ణవి కొక్కుర లుక్స్ తో ఆకట్టుకుంది. కొన్ని సన్నివేశాల్లో ఆమె క్యూట్ ఎక్స్ప్రెషన్స్ రిజిస్టర్ అవుతాయి. రాజ్ కుమార్ కసిరెడ్డి, సప్తగిరి .. తమ మార్క్ కామెడీతో సినిమా మొత్తాన్ని తమ భుజాలపై మోశారు అని చెప్పాలి. వీళ్ళ మార్క్ వన్ లైనర్స్ కూడా బాగా పేలాయి… నవ్వులు పూయించాయి. రాజ్ కుమార్ కసిరెడ్డి భార్య పాత్ర చేసిన విషిక, సప్తగిరి భార్య పాత్ర చేసిన హాసిని సుధీర్.. కూడా అక్కడక్కడా నవ్వులు పూయించారు. వెన్నెల కిషోర్ పాత్ర చిన్నదే అయినా.. ఉన్నంతసేపు నవ్విస్తుంది. ఈ పాత్రని ముగించిన తీరు కొంత డిజప్పాయింట్ చేస్తుంది అనే చెప్పాలి. పమ్మి సాయి, వీటీవీ గణేష్…ల కామెడీ కూడా ఆకట్టుకునే విధంగా డిజైన్ చేశారు. హరితేజ, రాజీవ్ కనకాల వంటి నటీనటుల పాత్రలు ఓకే ఓకే అన్నట్టు ఉన్నాయి.
సాంకేతిక నిపుణుల పనితీరు: కామెడీ ఎంటర్టైనర్లకి ఎప్పుడూ మంచి డిమాండ్ ఉంటుంది. మరీ ముఖ్యంగా ఫ్యామిలీ ఎలిమెంట్స్ కలిగిన కామెడీ ఎంటర్టైనర్లు బ్యాలన్స్డ్ గా తీయాలే కానీ బాక్సాఫీస్ వద్ద కాసుల వర్షం కురిపించే స్టామినా వాటికి ఉంది. అనిల్ రావిపూడి వంటి దర్శకుల సక్సెస్ ఫార్ములా అదే. ‘పురుషః’ విషయంలో దర్శకుడు వీరు వలవల కూడా అనిల్ రావిపూడి పద్ధతినే ఫాలో అయినట్టు అనిపిస్తుంది. సప్తగిరి, రాజ్ కుమార్ కసిరెడ్డి..ల పాత్రల కోసం రాసుకున్న కామెడీ ట్రాకులు వర్కౌట్ అయ్యాయి. కొన్ని వన్ లైనర్స్ కూడా పేలాయి.క్లైమాక్స్ లో హీరో ఫ్లాష్ బ్యాక్ ఎపిసోడ్ కి.. హీరోయిన్ పాత్రని లింక్ చేసిన ఎమోషన్ బాగుంది. కాకపోతే కొన్ని పాత్రలను అర్దాంతరంగా ముగించిన తీరు కొంచెం డిజప్పాయింట్ చేస్తుంది. ఉదాహరణకి వెన్నెల కిశోర్, రాజీవ్ కనకాల వంటి వాళ్ళ పాత్రలకి సరైన జస్టిఫికేషన్ ఇవ్వలేదు. ఇక ఒకటి, రెండు పాటలు బాగానే ఉన్నాయి. బ్యాక్ గ్రౌండ్ స్కోర్ ఓకే. సినిమా క్యాస్టింగ్ ని బట్టి నిర్మాణ విలువల విషయంలో ఎటువంటి లోటు చేయలేదని అర్ధం చేసుకోవచ్చు. కాకపోతే కొన్ని సీన్లకి అనవసరమైన వీఎఫ్ఎక్స్ జోడించారేమో అనిపిస్తుంది. అది మినహాయిస్తే.. సినిమాటోగ్రఫీ వర్క్ బాగుంది. రన్ టైం కూడా 2 గంటల 19 నిమిషాలే ఉండటం అనేది మరో ప్లస్ పాయింట్ గా చెప్పుకోవచ్చు.
విశ్లేషణ: ఈ మధ్య కాలంలో సరైన ఫ్యామిలీ ఎంటర్టైనర్లు రాలేదు. ఆ లోటుని ఫుల్ ఫిల్ చేసే లక్షణాలు ‘పురుషః’ చిత్రానికి ఉన్నాయి.ఎటువంటి అంచనాలు పెట్టుకోకుండా థియేటర్ కి వెళ్లిన ప్రేక్షకులు కచ్చితంగా కాసేపు నవ్వుకుని ఒక శాటిస్ఫేక్షన్ తో బయటకి వస్తారు. సో ఈ వీకెండ్ కి ‘పురుషః’ మంచి ఛాయసే.
ఫోకస్ పాయింట్: నవ్వించే ఫ్యామిలీ ఎంటర్టైనర్
రేటింగ్: 3/5
