నాగ్ తో సినిమానా..? వద్దులే బ్రదర్!

March 23, 2021 / 04:57 PM ISTByFilmy Focus

Join Us

నటుడిగా సినిమాలు చేసిన రాహుల్ రవీంద్రన్ ‘చిలసౌ’ అనే సినిమాతో దర్శకుడిగా మారాడు. మొదటి సినిమాతోనే సక్సెస్ అందుకొని.. తన పనితనంతో అందరినీ ఆశ్చర్యపరిచాడు. ఎలాంటి అంచనాలు లేకుండా విడుదలై టాలీవుడ్ లో బెస్ట్ ఫిలింగా నిలిచింది. ఈ సినిమా చూసే హీరో నాగార్జున అతడి దర్శకత్వంలో ‘మన్మథుడు 2’ సినిమాలో నటించాడు. ఈ సినిమా డిజాస్టర్ అయింది. దర్శకుడిగా రాహుల్ కెరీర్ పై కూడా బాగా ఎఫెక్ట్ చూపించింది.

ఇప్పటివరకు రాహుల్ మరో సినిమా మొదలుపెట్టలేకపోయాడు. అయితే రీసెంట్ గా గీతాఆర్ట్స్ లో అతడి సినిమా ఓకే అయినట్లుగా వార్తలొస్తున్నాయి. ఇదిలా ఉండగా.. తాజాగా రాహుల్ తన ట్విట్టర్ ఫాలోవర్లతో చాట్ సెషన్ లో పాల్గొన్నాడు. ఈ సందర్భంగా ఓ నెటిజన్ రాహుల్ తరువాత ప్రాజెక్ట్ గురించి అడుగుతూ.. నాగార్జున కోసం యాక్షన్ కథ చేసినట్లు అప్పట్లో చెప్పారు కదా.. ఆ ప్రాజెక్ట్ ఎంతవరకు వచ్చిందని ప్రశ్నించాడు. దానికి రాహుల్..

‘బ్రో.. ఆయన అభిమానులు ఇప్పటికీ నన్ను తిట్టుకుంటున్నారు. ఇప్పుడు ఆయనతో సినిమా వద్దులే.. భవిష్యత్తులో అన్నీ కుదిరితే ఆయనతో సినిమా చేస్తానేమో. అభిమానులను సంతృప్తి పరచగలనని అనుకున్నప్పుడు అది సాధ్యమవుతుందని’ చెప్పుకొచ్చారు. ప్రస్తుతానికైతే మాత్రం ఈ విషయంలో నిరాశ పరుస్తున్నందుకు క్షమించాలని కోరాడు. ‘మన్మథుడు2’ సినిమా రిజల్ట్ తనపై చాలా ప్రభావం చూపించిందని.. డిప్రెషన్ లోకి వెళ్లిపోయానని అప్పట్లో రాహుల్ చెప్పాడు. ప్రస్తుతానికి రాహుల్ నటుడిగా సినిమాలు సైన్ చేస్తున్నాడు.