రాజా రవీంద్ర(Raja Ravindra)… పరిచయం అవసరం లేని పేరు. ఒకప్పుడు ఇతను హీరోగా సినిమాలు చేశాడు. తెలుగుతో పాటు తమిళంలో కూడా ఇతను హీరోగా చేసిన సినిమాలు ఉన్నాయి. తర్వాత కొన్ని సినిమాల్లో సెకండ్ హీరోగా చేశాడు. ఆ తర్వాత క్యారెక్టర్ ఆర్టిస్ట్ గా మారాడు. నెగిటివ్ రోల్స్ చేశాడు. చిన్న హీరోల సినిమాల్లో విలన్ రోల్స్ చేసినా అవి క్లిక్ అవ్వలేదు. ప్రస్తుతం అయితే క్యారెక్టర్ ఆర్టిస్ట్ గా సినిమాల్లో నటిస్తూనే.. కొంతమంది స్టార్స్ కి మేనేజర్ గా కూడా వ్యవహరిస్తున్నాడు.
ఒకప్పుడు రవితేజ కి మేనేజర్ గా వ్యవహరించేవాడు. తర్వాత సునీల్, జయసుధ, నిఖిల్, రాజ్ తరుణ్ వంటి స్టార్స్ వద్ద కూడా పనిచేశాడు. ఇప్పుడైతే మెగాస్టార్ చిరంజీవికి పూర్తిస్థాయి మేనేజర్ గా వ్యవహరిస్తున్నారు. మరోవైపు సోషల్ మీడియాలో యాక్టివ్ గా ఉండే ప్రయత్నం చేస్తున్నాడు. ప్రత్యేకంగా పాడ్ క్యాస్ట్ ఛానల్ ను స్థాపించి.. ఇండస్ట్రీలో ఉన్న కొంతమంది ఫిల్మ్ మేకర్స్ ను ఇంటర్వ్యూలు చేస్తున్నాడు. అలాగే కొన్ని సినిమాల రిలీజ్ టైమ్లో ఆయన కూడా ఇంటర్వ్యూలు ఇస్తూ వస్తున్నాడు.
ఆ విషయాలు పక్కన పెట్టేస్తే.. రాజా రవీంద్ర తాజాగా సోషల్ మీడియాలో ఓ ట్వీట్ వేశాడు. ‘తగలబడిపోయిన కొంపలో ఎన్ని విలువైన వస్తువులున్నా వేస్టే’ అనేది అతని ట్వీట్ సారాంశం. ఈ ట్వీట్ కి ఎటువంటి హ్యాష్ ట్యాగ్స్ జోడించలేదు. కానీ చాలా మంది దీన్ని ‘ది ప్యారడైజ్’ సినిమాకి రిలేట్ చేసుకుంటున్నారు. అందుకు కారణాలు కూడా ఉన్నాయి. అవేంటంటే.. ‘ది ప్యారడైజ్’ సినిమాలో రాజా రవీంద్ర కూడా నటించాడు.
అయితే ఆ పాత్రకి పెద్దగా ఆర్క్ ఏమీ ఉండదు. సందర్భం లేకుండా ఆ పాత్ర వచ్చి వెళ్తుంతుంది. కాబట్టి.. ‘అతని సన్నివేశాలు ఈ సినిమాలో ఇంకా ఉన్నాయేమో, ఎడిటింగ్లో అతని పోర్షన్ ట్రిమ్ అయ్యి ఉంటుంది, ఆ ఫ్రస్ట్రేషన్ తోనే రాజా రవీంద్ర ఇలా ట్వీట్ చేసి ఉంటాడు’ అని ఎక్కువ మంది భావిస్తున్నారు. పైగా దర్శకుడు శ్రీకాంత్ ఓదెల ‘ది ప్యారడైజ్’ సినిమా ప్రమోషన్స్ లో ‘తగలబడతది’ అనే పదాన్ని కూడా పలుమార్లు వాడిన సంగతి తెలిసిందే.
ప్రస్తుతం సినిమాకి వస్తున్న నెగిటివ్ టాక్ ను దృష్టిలో పెట్టుకుని కూడా రాజా రవీంద్ర ఈ కామెంట్స్ చేశాడనే వాదన కూడా మొదలైంది. చూడాలి మరి.. అతను ఏమైనా వివరణ ఇస్తాడేమో..!
తగలబడిపోయిన కొంపలో ఎన్ని విలువైన వస్తువులున్నా వేస్టే.
— Raja Raveendar (@Rajaraveendar) September 24, 2026
