రాజశేఖర్ కొత్త సినిమా టైటిల్ బయట పెట్టిన కుర్రహీరో

ఆవేశం, అనుబంధం నిండిన పాత్రలతో తెలుగు ప్రేక్షకులకు చేరువైన రాజశేఖర్ కొంతకాలంగా తెరపై కనపడటం లేదన్నది తెలిసిందే. చేస్తున్న ఒకటీ అరా ప్రయత్నాలు కూడా ఆయనకి సరైన ఫలితాన్ని తెచ్చిపెట్టలేకపోతున్నాయ్. దీంతో విలన్ గా మారిపోదామని కూడా ఫిక్స్ అయిన ఒకప్పటి ఈ యాంగ్రీ యంగ్ మాన్ దానికంటే ముందు హీరోగా ఒక సాలిడ్ హిట్ కొట్టాలని తనకుతానే షరతు విధించుకున్నారు. తేజతో సినిమా ఆగిపోయిన ప్రవీణ్ సత్తారు రూపంలో రాజశేఖర్ కి ఓ అవకాశం లభించింది.

దర్శకుడు ప్రవీణ్ సత్తారు రాజశేఖర్ తో సినిమా విషయంపై స్పందిస్తూ సినిమా చేస్తున్నట్టు ఒప్పుకున్నాడే తప్ప వివరాలేవీ చెప్పలేదు. అయితే కథ, తుంగభద్ర, ఎల్ 7 వంటి సినిమాల్లో హీరోగా చేసిన అదిత్ అరుణ్ ఈ సినిమా విషయాలను బయటపెట్టాడు. ‘గరుడ వేగ’ అనే టైటిల్ ని ఈ సినిమాకి ఖరారు చేశారట. ప్రస్తుతం చిత్రీకరణ దశలో ఉన్న ఈ సినిమా పూర్తి చేసి పుల్లెల గోపీచంద్ బయోపిక్ చేయాలన్నాయి ప్రవీణ్ సత్తారు ప్లాన్. అన్నట్టు అదిత్ కూడా ఈ సినిమాలో ఓ పాత్ర చేస్తున్నాడట. రాజశేఖర్ పాత్రేమిటన్నది సస్పెన్స్ గా మారింది. హీరోగా హిట్ కొట్టాలన్న రాజశేఖర్ కల ఈ సినిమాతో తీరుతుందంటారా..?