బీజేపీ తరుపున రజనీ ప్రచారం..?

తమిళనాడులో ప్రస్తుతం ఎన్నికల వాతావరణం నడుస్తోంది. ఈ ఎన్నికల సందర్భంగా సూపర్ స్టార్ రజినీకాంత్ నటించిన కబాలి చిత్ర విడుదల కూడా వాయిదా పడింది. అయితే ఈ ఎన్నికల్లో భారతీయ జనతా పార్టీ(బీజేపీ) తరుపున రజనీకాంత్ ప్రచారం చేయనున్నట్లు తమిళనాట వార్తలు వినవస్తున్నాయి. ఈ మేరకు మూడు ప్రధాన వేదికల్లో రజనీ ప్రసంగించేలా బీజేపీ జాతీయ ప్రధాన కార్యదర్శి పి. మురళీధరరావు ఇప్పటికే ఆయన్ను ఒప్పించారని సమాచారం. మరోవైపు జయలలిత వైపే తమిళ ఓటర్లు మొగ్గుచూపుతున్నారని ఆమె మళ్ళీ ప్రభుత్వ ఏర్పాటు దాదాపు ఖాయమేనని వార్తలు వినవస్తున్న నేపధ్యంలో రజనీ చేత బీజేపీ ప్రచారం చేయిస్తుండటం ఆ పార్టీకి కలిసి వస్తుందా లేదా అన్నది ఎన్నికల ఫలితాల వరకు వేచిచూడాలి. కాగా ప్రస్తుతం రోబో 2.0 షూటింగ్ లో బిజీగా ఉన్నారు రజినీ.