మరోసారి “నెరుప్పు డా..” అంటోన్న రజనీ

“నెరుప్పు డా….” (తెలుగులో నిప్పు రా) ఈ ముక్క వినపడగానే “కబాలి” ట్రైలర్ లోని రజనీ కళ్ళముందు కదలాడుతాడు. సంతోష్ నారాయణన్ బాణీ కట్టిన ఈ పాట సినిమా కంటే సూపర్ హిట్ అయ్యింది. చివరికి అర్థం తెలీని వాడు కూడా ఆవేశంతో ఊగిపోయాడు. కాలర్ ట్యూన్ రూపేణా కబాలి సినిమాకి మంచి కలెక్షన్లు కూడా రాబట్టింది ఈ పాత. అయితే పాటలోని శౌర్యం సినిమాలో పూర్తి స్థాయిలో లేకపోయేసరికి ‘నిప్పు’ కూడా నీరుగారిపోయింది. అయినా మరోసారి రజనీ నోట ఈ మాట వినబడనుందిట.

శివాజీ గణేషన్ మనవడు, ప్రభు తనయుడు అయినా విక్రమ్ ప్రభు హీరోగా నటిస్తున్న ఓ సినిమాలో రజని అతిథి పాత్రలో దర్శమివ్వనున్నారట. ఆ సినిమా పేరే “నెరుప్పు డా..”. కబాలి సినిమాలోని ఈ పాట ఇలా విడుదలైందో లేదో అలా అదే పేరుతో సినిమా మొదలెట్టేసాడు విక్రమ్ ప్రభు. దీంతో సినిమాకి మంచి ఊపొచ్చింది. ఇప్పుడు రజనీ అతిథి పాత్రతో మరింత హైప్ తీసుకొచ్చే పనిలో ఉన్నారు చిత్ర బృందం. శివాజీ గణేషన్ అంటే రజనీకి వల్లమాలిన అభిమానం. కుటుంబ స్నేహితులు కూడా. ఆయనతో కలిసి ‘పడయప్పా’ (తెలుగులో నరసింహ) వంటి సినిమాల్లో నటించిన రజనీ చంద్రముఖి సినిమాలో ప్రభు తోను తెర పంచుకున్నారు. ఈ రకంగా వారు కోరితే ‘తలైవా’ తప్పుకునే అవకాశమే లేదు. చూద్దాం ఈ నిప్పు ఎంత మంట రాజేస్తుందో..!