రష్మికపై ఆగ్రహం వ్యక్తం చేస్తున్న అభిమానులు

కన్నడ బ్యూటీ రష్మిక “ఛలో” సినిమాతో తెలుగువారికి పరిచయమైంది. నాగశౌర్య కి జోడీగా నటించి ఆకట్టుకుంది. ఇప్పుడు ఆమె తెలుగులో విజయ్‌ దేవరకొండతో కలిసి “గీత గోవిందం” సినిమాలో నటించింది. శ్రీరస్తు శుభమస్తు సినిమాతో మంచి మార్కులు అందుకున్న పరశురామ్ దర్శకత్వంలో రూపుదిద్దుకున్న సినిమా ఫస్ట్ లుక్ నుంచి ఆకట్టుకుంటోంది. టీజర్ తో పాటు సాంగ్స్ కి విపరీతమైన రెస్పాన్స్ వచ్చింది. గీతా ఆర్ట్స్ 2 బ్యానర్ పై బన్నీ వాసు నిర్మించిన ఈ మూవీ రేపు (ఆగస్టు 15న) థియేటర్లోకి రానుంది. అయితే రెండు రోజుల ముందే సినిమా ఆన్ లైన్ లో లీకై హంగామా సృష్టించింది. ఇందులో విజయ్‌ దేవరకొండ, రష్మిక రొమాన్స్ చూసి అందరూ ఎంజాయ్ చేశారు.

రాత్రివేళ బస్ లో అందరూ నిద్రపోతుంటే రష్మిక విజయ్ లో లిప్ కిస్ పెట్టడం.. సినిమా చూడాలనే ఆత్రుతని యువతలో పెంచింది. ఇది సినిమా ప్రమోషన్ కి బాగానే ఉపయోగపడింది. కానీ రష్మికకి మాత్రం చిక్కులు తెచ్చి పెట్టింది. రష్మిక, కన్నడ హీరో రక్షిత్ శెట్టిని ప్రేమించింది. ఇద్దరికీ నిశ్చితార్ధం కూడా జరిగింది. త్వరలోనే పెళ్లిచేసుకోబోతున్నారు. ఇటువంటి సమయంలో లిప్ లాక్ సన్నివేశంలో నటించడం అవసరమా? అంటూ విమర్శిస్తున్నారు. పూర్ ఫెలో అంటూ రక్షిత్ శెట్టిని ఉడికిస్తున్నారు. అసలు టాలీవుడ్ కి ఎందుకెళ్లావ్? అంటూ కొందరు అభిమానులు రష్మికపై ఆగ్రహం వ్యక్తం చేస్తున్నారు. ఈ విమర్శలను ఎలా ఎదుర్కోవాలో తెలియక రష్మిక అజ్ఞాతంలోకి వెళ్లిపోయింది.