రకుల్ తో మరోమారు పండగ చేస్కోనున్న రామ్!

ప్రస్తుత కథానాయికల్లో యమ స్పీడుగా ముందుకు సాగుతున్న యువ కథానాయకి రకుల్ ఇప్పటికే “పవన్, మహేష్” మినహా అందరు కథానాయకులతో జత కట్టేసిన ఈ పంజాబీ సుందరి జయాపజయాలతో సంబంధం లేకుండా వరుసగా అవకాశాలతో దూసుకుపోతోంది.

రకుల్ తో ఓసారి జతకట్టిన ప్రతి కథానాయకుడు ఆమెతో మరోమారు రొమాన్స్ చేసేందుకు ఉవ్విళ్ళూరుతుండడం ఇక్కడ విశేషం. “బ్రూస్ లీ” తర్వాత రామ్ చరణ్ మళ్ళీ “ధృవ” కోసం రకుల్ ను ఎంపిక చేసుకోగా.. అదే బాటలో “పండగ చేస్కో”లో రకుల్ తో సరసాలాడిన రామ్ మరోమారు తన తాజా చిత్రం కోసం కథానాయికగా రకుల్ ను ఎన్నుకొన్నాడని తెలుస్తోంది.

“కందిరీగ” ఫేమ్ సంతోష్ శ్రీనివాస్ దర్శకత్వంలో తెరకెక్కనున్న ఈ చిత్రాన్ని 14 రీల్స్ ఎంటర్ టైన్మెంట్స్ సంస్థ నిర్మించనుంది. ఈ సినిమాలో నటించడానికి రకుల్ కు అక్షరాలా కోటి రూపాయలు సమర్పించుకొన్నట్లు సమాచారం!