రామ్ చరణ్ Ram Charan) కెరీర్‌లో అత్యంత ప్రతిష్టాత్మకంగా రూపుదిద్దుకుంటున్న సినిమా గేమ్ ఛేంజర్ (Game Changer) . శంకర్ (Shankar) దర్శకత్వంలో రూపొందుతున్న ఈ సినిమా పాన్ ఇండియా రేంజ్‌లో ప్రేక్షకుల ముందుకు రాబోతుంది. సంక్రాంతి సందర్భంగా జనవరి 10న ఈ చిత్రాన్ని విడుదల చేయాలని నిర్ణయించారు. ఈ భారీ బడ్జెట్ సినిమా, దిల్ రాజు (Dil Raju) నిర్మాణంలో రూపొందుతుండటం, రామ్ చరణ్‌తో శంకర్ ఫస్ట్ టైమ్ కాంబినేషన్ కావడంతో అంచనాలు తారాస్థాయిలో ఉన్నాయి. ఆర్ఆర్ఆర్ (RRR) సినిమాతో గ్లోబల్ స్టార్‌గా మారిన రామ్ చరణ్, అప్పటి నుంచి తన తర్వాతి ప్రాజెక్ట్‌పై భారీగా ఆశలు పెట్టుకున్నాడు.
అయితే ఆచార్య (Acharya) చిత్ర ఫ్లాప్ తో కొంత మార్కెట్ పై ప్రభావం పడే ఛాన్స్ ఉందనే టాక్ వచ్చింది. దీంతో ఇప్పుడు గేమ్ ఛేంజర్ ద్వారా పాన్ ఇండియా మార్కెట్‌పై చరణ్ పట్టు సాధించాలి. ఈ సినిమా విజయంపై హిందీ మార్కెట్‌లో చెర్రీ స్టామినా ఏమాత్రం ఉందో తేలనుంది. ఇప్పటి వరకు గేమ్ ఛేంజర్ బడ్జెట్ భారీగా పెరిగినట్లు సమాచారం. నిర్మాణ ఖర్చులు, రీమ్యునరేషన్‌లు కలిపి 400 కోట్ల మార్క్ దాటినట్లు తెలుస్తోంది.
నాన్-థియేట్రికల్ రైట్స్ రూపంలో ఇప్పటికే 200 కోట్లు రాబట్టిన ప్రొడ్యూసర్స్, థియేటర్ రన్ ద్వారా మిగిలిన మొత్తాన్ని రికవర్ చేయాలని భావిస్తున్నారు. తెలుగు రాష్ట్రాల్లో సంక్రాంతి సీజన్ అదనపు ప్రయోజనంగా ఉన్నప్పటికీ, హిందీ మార్కెట్‌లో సినిమా ఎలా ఆడుతుందనేది కీలకంగా మారింది. బాహుబలి (Baahubali), పుష్ప 2 (Pushpa 2: The Rule), దేవర (Devara) వంటి చిత్రాలు నార్త్ బెల్ట్‌లో సాధించిన విజయాలు పాన్ ఇండియా సినిమాలకు మార్గదర్శకంగా నిలిచాయి.
అల్లు అర్జున్ (Allu Arjun), ఎన్టీఆర్ (Jr NTR) వంటి హీరోలు రాజమౌళి (S. S. Rajamouli) సపోర్ట్ లేకుండానే తమ మార్కెట్‌ను స్థిరపర్చుకున్నారు. ఇప్పుడు రామ్ చరణ్ కూడా అదే రీతిలో తన సత్తా చాటాల్సి ఉంది. ఆర్ఆర్ఆర్ విజయానికి రాజమౌళి దర్శక ప్రతిభ ప్రధాన కారణమని నమ్మే కొంతమంది, చరణ్ తనకంటూ ప్రత్యేక స్థానం సాధించగలడా అనే సందేహాన్ని వ్యక్తం చేస్తున్నారు. మరి రామ్ చరణ్ తానేంటో నిరూపించుకునే ఈ అగ్ని పరీక్షలో గేమ్ ఛేంజర్ ఎలా రాణిస్తుందో చూడాలి.
