మెగా పవర్ స్టార్ రామ్ చరణ్ తేజ్ ప్రస్తుతం సురేంధర్ రెడ్డి దర్శకత్వంలో ధ్రువ సినిమా షూటింగ్ లో బిజీగా ఉన్నారు. ఈ సినిమా ఆగస్టుకు రిలీజ్ అయ్యేలా చిత్ర బృందం ప్లాన్ చేస్తోంది. ఈ చిత్రం తర్వాత ఎవరి దర్శకత్వంలో రామ్ చరణ్ నటించనున్నాడు అనే అంశంపై ఫిల్మ్ నగర్ లో ఆసక్తి నెలకొంది. కొన్ని రోజుల క్రితం వరకు సుకుమార్ తో సైన్స్ ఫిక్షన్ కథలో నటించడానికి చరణ్ ఒకే చెప్పినట్లు వార్తలు వినిపించాయి. చిత్రం పేరు ఫార్ములా ఎక్స్ గా ఖరారు చేసినట్లు, ఇందులో చెర్రీ నయా లుక్ తో కనిపించనున్నట్లు కథనాలు వెలువడ్డాయి.
ప్రస్తుతం మాటల మాంత్రికుడు త్రివిక్రమ్ దర్శకత్వంలో చరణ్ నెక్స్ట్ సినిమా ఉంటుందనే వార్త చక్కర్లు కొడుతోంది. “అ.ఆ” సినిమాతో త్రివిక్రమ్ చిన్న హీరోలతో కూడా భారీ హిట్లు అందుకోగలరని నిరూపించుకున్నారు. చరణ్ కి గత చిత్రాలు గోవిందుడు అందరి వాడేలే, బ్రూస్లీ లు నిరాశ పరిచాయి. అతన్ని హిట్ ట్రాక్ లో తీసుకు రావడానికి బాబాయ్ పవర్ స్టార్ పవన్ కళ్యాణ్ పావులు కదిపినట్లు సమాచారం.
చరణ్ తో సినిమా చేయమని త్రివిక్రమ్ ని పవన్ అడిగారని .. అందుకు అతను ఒకే చెప్పడం జరిగి పోయిందని టాక్. నిర్మాత దిల్ రాజు కూడా రెడీ గా ఉండడంతో వీరి కాంబినేషన్లో సినిమా పట్టాలెక్కే అవకాశాలున్నాయని తెలిసింది. మంచి హిట్ లేక ఇబ్బంది పడుతున్న ఈ సమయంలో సుకుమార్ తో ప్రయోగాల కంటే త్రివిక్రమ్ తో సినిమా చేయడమే మంచిదని చరణ్ అభిమానులు కోరుకుంటున్నారు.
