ఎం.ఎస్. ధోనీ.. పరిచయం అక్కర్లేని పేరు. భారత్ కు రెండోసారి క్రికెట్లో వరల్డ్ కప్ తెచ్చిపెట్టిన కెప్టెన్. ఇతనికి ప్రపంచ వ్యాప్తంగా అభిమానులున్నారు. ఎంతోమందికి స్ఫూర్తిగా నిలిచిన మిస్టర్ కూల్ జీవితం ఆధారంగా తెరకెక్కిన ‘ఎం.ఎస్ ధోనీ – ది అన్‌టోల్డ్ స్టోరీ’ సినిమా ఈ నెల 30 న ప్రపంచవ్యాప్తంగా రిలీజ్ కానుంది. ఇ టీవలే సెన్సార్ కార్యక్రమాలు పూర్తి చేసుకున్న ఈ మూవీ ఎలాంటి కట్స్ లేకుండా క్లీన్ ‘యూ’ సర్టిఫికేట్ పొందింది. 3 గంటల 10 నిమిషాల నిడివి గల ఈ ఫిల్మ్ ప్రపంచ వ్యాప్తంగా మొత్తం 60 దేశాలలో 4,500 స్క్రీన్లలో విడుదలవుతోంది.
ఒక బాలీవుడ్ చిత్రం ఇన్ని సెంటర్లలో రిలీజ్ అవటం ఇదే తొలిసారి. భారత్ లో కూడా ఎక్కువ థియేటర్లలో రిలీజ్ అవుతోంది. ప్రముఖ దర్శకుడు నీరజ్ పాండే దర్శకత్వంలో వస్తున్న ఈ మూవీలో సుశాంత్ సింగ్ ధోనీగా అలరించనున్నాడు. ధోని భార్య సాక్షి పాత్రలో కైరా అద్వాణీ నటిస్తోంది. లవర్ గా దిశా పటాని కనిపించనుంది. ఇందులో క్రికెటర్లగా కొంతమంది నటులు గెస్ట్ అప్పీరియన్స్ ఇస్తున్నారు. వారిలో మెగా పవర్ స్టార్ రామ్ చరణ్ తేజ్ కూడా ఉన్నాడు. అతను పోషించే పాత్ర పేరు బయటికి వచ్చింది. సురేష్ రైనా క్యారెక్టర్లో చెర్రీ మెరవనున్నట్లు సమాచారం. రైనాగా రామ్ చరణ్ ఎలా ఆడాడో మరో మూడు రోజుల్లో తెలియనుంది.
