PEDDI: చరణ్ వర్సెస్ శివన్న.. విలనిజమా?

గ్లోబల్ స్టార్ రామ్ చరణ్ నటిస్తున్న ‘పెద్ది’ సినిమా షూటింగ్ స్పాట్ నుంచి వస్తున్న వార్తలు గూస్ బంప్స్ తెప్పిస్తున్నాయి. ప్రస్తుతం హైదరాబాద్ శివార్లలోని అల్యూమినియం ఫ్యాక్టరీలో వేసిన ఒక భారీ సెట్ లో షూటింగ్ జరుగుతోంది. అయితే ఇది సాధారణ ఫైట్ సీక్వెన్స్ కాదట. ఇందులో చరణ్ తో తలపడుతున్నది మరెవరో కాదు, కన్నడ కంఠీరవ శివరాజ్ కుమార్. ఇద్దరు బడా స్టార్లు నువ్వా నేనా అన్నట్లు తలపడుతుంటే ఆ ఇంటెన్సిటీ ఎలా ఉంటుందో ఊహించుకుంటేనే కిర్రాక్ గా ఉంది.

PEDDI

అయితే ఇక్కడే అందరిలో ఒక పెద్ద సందేహం మొదలైంది. శివరాజ్ కుమార్ కన్నడలో తిరుగులేని స్టార్ హీరో. అలాంటి వ్యక్తి చరణ్ సినిమాలో ఫైట్ చేస్తున్నారంటే, ఆయన పాత్ర నెగిటివ్ గా ఉంటుందా? అనే చర్చ సోషల్ మీడియాలో మొదలైంది. సాధారణంగా స్టార్ హీరోలు విలన్ పాత్రలు చేయడానికి ఒప్పుకోరు. కానీ ఈ మధ్య కాలంలో హీరోలు పవర్ ఫుల్ పాత్రలు దొరికితే గ్రే షేడ్స్ ఉన్న క్యారెక్టర్లు చేయడానికి వెనకాడటం లేదు.

వినిపిస్తున్న టాక్ ప్రకారం.. శివన్న పాత్ర పూర్తి స్థాయి విలన్ గా ఉండకపోవచ్చు. ఆయన పాత్ర చాలా పవర్ ఫుల్ గా, ఆత్మగౌరవం ఉన్న వ్యక్తిగా ఉంటుందట. బహుశా హీరోకి, ఆయనకి మధ్య వచ్చే సిద్ధాంతపరమైన గొడవ లేదా ఒక బలమైన కారణం వల్ల ఈ ఫైట్ జరుగుతుండొచ్చు. అంటే ఇది విలనిజం కంటే, ఇద్దరు బలవంతుల మధ్య జరిగే ఘర్షణలా ఉండబోతోందని సమాచారం. ‘జైలర్’ లో నరసింహగా ఆయన చూపించిన స్వాగ్ లాంటిదే ఇందులోనూ ఎక్స్ పెక్ట్ చేయొచ్చు.

బుచ్చిబాబు సానా ఈ ఫైట్ ను కేవలం యాక్షన్ లా కాకుండా, ఎమోషన్ తో కలిపి డిజైన్ చేశారట. అల్యూమినియం ఫ్యాక్టరీ బ్యాక్ డ్రాప్ అంటేనే రస్ట్, డస్ట్, రా నెస్ ఉంటుంది. అక్కడ చరణ్, శివరాజ్ కుమార్ మధ్య వచ్చే డైలాగ్స్, ఆ తర్వాత జరిగే ఫైట్ సినిమాకే హైలైట్ గా నిలుస్తుందట. శివన్న పాత్రకు కొంచెం నెగిటివ్ టచ్ ఉన్నా, చివర్లో ఆడియన్స్ చేత చప్పట్లు కొట్టించేలాగే ఆయన క్యారెక్టర్ ఉంటుందని భావిస్తున్నారు.