నటీనటుల కెరీర్ ని మలుపు తిప్పే చిత్రం ఒకటుంటుంది. ఆ సినిమా అతని/ ఆమె క్రేజ్ ని అమాంతం పెంచివేస్తుంది. మెగాస్టార్ చిరంజీవికి ఖైదీ మాదిరిగా.. ప్రభాస్ కి బాహుబలి చిత్రం మాదిరిగా చరణ్ కి రంగస్థలం కానుంది. స్టార్ హీరో అయి ఉండి.. చెవిటి వాడి పాత్ర చేయడానికి ఒప్పుకొని చరణ్ మొదట సాహసం చేశారు. ఆ పాత్రలో జీవించి శెభాష్ అనిపించారు. చిరంజీవి కూడా కొడుకు నటన, సినిమా గురించి ప్రీ రిలీజ్ వేడుకలో గొప్పగా చెప్పారు. టీజర్, ట్రైలర్ లలో చిట్టిబాబుగా రామ్ చరణ్ కనబరచిన నటన అందరినీ ఆశ్చర్యపరుస్తోంది. చరణ్ సినిమాలన్నీ ఒక ఎత్తు… రంగస్థలం మరో ఎత్తు అని సినీ విశ్లేషకులు అభినందిస్తున్నారు.
ఇక చరణ్ సరసన హీరోయిన్ గా నటించిన సమంత అయితే చరణ్ ఈ సినిమా కోసం చాలా కష్టపడ్డారని, ఆయన కెరీర్లో రంగస్థలం కీలక చిత్రం కానుందని చెప్పింది. ఇకపై చరణ్ కెరీర్ గురించి మాట్లాడుకునేటప్పుడు రంగస్థలం ముందు… తర్వాత అని మాట్లాడుకుంటారని వెల్లడించింది. సుకుమార్ దర్శకత్వంలో రూపొందిన ఈ చిత్రానికి దేవీశ్రీ ప్రసాద్ అద్భుతమైన పాటలను ఇచ్చారు. అనసూయ, ఆది పినిశెట్టి, జగపతిబాబు కీలకపాత్రలు పోషించిన ఈ మూవీ మరో రెండు రోజుల్లో థియేటర్లోకి రానుంది. మైత్రి మూవీ మేకర్స్ వారు నిర్మించిన సినిమా అనేక రికార్డులు కొల్లకొడుతుందని మెగా ఫ్యాన్స్ ధీమాగా ఉన్నారు.
