వైఎస్సార్ బయోపిక్ ‘యాత్ర’లో నటించనున్న రమ్యకృష్ణ

2019 ఎన్నికల నాటికి మహా నేత, దివంగత మాజీ ముఖ్యమంత్రి వైయస్‌ రాజశేఖర్‌రెడ్డి బయోపిక్ ని రిలీజ్ చేయాలనీ భావిస్తున్నారు. మహివి రాఘవ్‌ దర్శకత్వంలో తెరకెక్కనున్న బయోపిక్ లో వైఎస్సార్‌ పాత్రను మలయాళ స్టార్‌ మమ్ముట్టి పోషిస్తున్న సంగతి తెలిసిందే. వైఎస్సార్ మీద ఉన్న అభిమానంతో ఈ సినిమా చేయడానికి ఆయన ఒప్పుకున్నారు. అలాగే ఇతర పాత్రల కోసం నటీనటులను ఎంపిక చేసేపనిలో చిత్ర బృందం బిజీగా ఉంది. రాజశేఖర్‌రెడ్డి భార్య వైఎస్ విజయమ్మ పాత్ర కోసం నయనతారను, శరణ్యను సంప్రదించారు. వారు తమతమ ప్రాజక్ట్స్ లో బిజీగా ఉండడంతో రమ్యకృష్ణను సంప్రదించినట్టు తెలిసింది.

బాహుబలి సినిమాలో శివగామిగా దేశవ్యాప్తంగా అభిమానులను సంపాదించుకున్న ఈమె ఒకే అంటే సినిమాకి మరింత క్రేజ్ రానుంది. రీసెంట్ గా కథ విన్న రమ్యకృష్ణ నటించడానికి ఆసక్తి కనబరుస్తున్నట్టు ఫిలిం నగర్ చెప్పారు. ఆమె సైన్ చేయగానే అధికారికంగా ప్రకటించనున్నారు. అలాగే జగన్, భారతి పాత్రలకు కూడా అనేకమంది నటీనటులను పరిశీలిస్తున్నారు. 70ఎంఎం ఎంటర్‌టైన్‌మెంట్స్‌ పతాకంపై విజయ్‌ చిల్లా, శశి దేవిరెడ్డి నిర్మిస్తున్న ఈ సినిమా వైఎస్సార్ అభిమానులతో పాటు అందరినీ ఆకట్టుకునేలా తెరకెక్కించనున్నారు.