అరిస్తే యాసిడ్ పోస్తానంటున్న క్యూట్ హీరోయిన్!

“ప్రేమించకపోతే యాసిడ్ పోసేస్తా, నన్ను కాకుండా వాడ్ని ప్రేమిస్తావా.. అయితే నీ మీద యాసిడ్ పోసేస్తా” ఇలాంటి స్టేట్ మెంట్స్ సాధారణంగా కొందరు అబ్బాయిల దగ్గర వింటూ ఉంటాం. చాలా సంఘటనలు టీవీలో చూసి ఉంటాం. కానీ.. మొట్టమొదటిసారిగా ఓ అమ్మాయి అది కూడా ఓ స్టార్ హీరోయిన్ “అరిస్తే యాసిడ్ పోసేస్తా” అంటూ పబ్లిక్ గా వందల మంది అబ్బాయిలని బెదిరించింది. ఆ స్టార్ హీరోయిన్ మరెవరో కాదు “ఛలో” చిత్రంతో తెలుగు తెరకు పరిచయమైన కన్నడ కన్యకామణి రష్మిక మండన్నా. అమ్మడు నటించిన తాజా చిత్రం “గీత గోవిందం” ఆడియో విడుదల వేడుక నిన్న రాత్రి జె.ఆర్.సి ఫంక్షన్ హాల్లో ఘనంగా జరిగింది.

ఈ వేడుకకి అల్లు అర్జున్ ముఖ్య అతిధిగా విచ్చేయగా.. ఆయన అభిమానులందరూ ఆడియో వేడుకలో ఎవరు మాట్లాడుతున్నా “బన్నీ కావాలి, బన్నీ మాట్లాడాలి” అని గోల చేసేవారు. వాళ్ళకి తోడుగా విజయ్ దేవరకొండ ఫ్యాన్స్ కూడా జాయిన్ అవ్వడంతో.. సరిగ్గా హీరోయిన్ రష్మిక మాట్లాడ్డానికి వచ్చేసరికి బన్నీ, విజయ్ ఫ్యాన్స్ ఇద్దరూ “బన్నీ కావాలి, విజయ్ కావాలి” అని అరవడం మొదలెట్టారు. దాంతో.. రష్మికకి చిర్రెత్తుకొచ్చింది. అంతే వెంటనే.. “నేను రెండు నిమిషాలు మాట్లాడతాను, ఎవరైనా బన్నీగారు కావాలి, విజయ్ కావాలి అని అరిస్తే యాసిడ్ పోసేస్తాను” అంటూ వార్నింగ్ ఇచ్చింది. క్యూట్ గా ఉండే రష్మిక ఆ మాట అన్నది కాబట్టి కుర్రాళ్ళందరూ సరదాగా తీసుకొన్నారు కానీ.. ఇదే మాట వేరే ఎవరైనా అని ఉంటే ఈపాటికి రచ్చ రచ్చ అయిపోయేది.