సినిమా పరిశ్రమలో హీరోయిన్ల, నటీమణులు, మహిళా నిర్మాతలు, టెక్నీషియన్లు.. పేర్ల విషయంలో ఓ పద్ధతి ఉంటుంది. వారికి పెళ్లి అయినా కూడా తండ్రి ఇంటి పేరుతోనే పిలుస్తుంటారు. కావాలంటే మీరే చూసుకోండి. ఇప్పటివరకు ఎవరూ పెళ్లి తర్వాత ఇంటి పేరు మార్చుకున్నది లేదు. ఒకరిద్దరు మార్చుకున్నా.. మళ్లీ కొన్ని రోజుల్లోనే వెనక్కి వచ్చేశారు. అంతలా తమ ఇంటి పేరు విషయంలో పట్టుదలగా ఉంటారు. అయినా ఏ ఇంటి పేరు చెప్పుకోవాలి అనేది వారి ఇష్టం కదా అంటారా. అది కూడా నిజమే.
అయితే, ఇప్పుడు ఈ మధ్య కాలంలో తొలిసారిగా ఓ హీరోయిన్ ఇంటిపేరు మారిపోయింది. ఈ మేరకు ఆమె భర్త ఓ సినిమా ప్రీ రిలీజ్ ఈవెంట్లో మాట్లాడుతూ ఇంటి పేరు మార్చి చెప్పారు. దీంతో ఆయన అభిమానులు అంతా పెద్ద ఎత్తున చప్పట్లు, ఈలలతో వేదిక దగ్గర సందడి చేశారు. ఇదంతా జరిగింది ఆనంద్ దేవరకొండ, వైష్ణవి చైతన్య కాంబినేషన్లో ఆదిత్య హాసన్ తెరకెక్కించిన ‘ఎపిక్’ సినిమా ప్రీరిలీజ్ ఈవెంట్లో.
సెప్టెంబర్ 11న ఆనంద్ దేవరకొండ సినిమా (ఎపిక్) ఉంది. అక్టోబర్ 16న నా సినిమా (రణబాలి) ఉంది. మళ్లీ నవంబర్లో దేవరకొండ రష్మిక సినిమా ఉంది. ఇంకా నాన్స్టాప్గా అభిమానుల్ని కలుస్తూనే ఉంటాం అని విజయ్ దేవరకొండ చెప్పాడు. ఈ లైన్ను ఫ్లోలో చదివితే ఏమీ అనిపించదు. అయితే రష్మిక మందన ఫ్యాన్స్ చదివితే మాత్రం ‘మందన’ అనే పేరును మిస్ అవుతారు. ఎన్నో ఏళ్లుగా ఆమెను అలానే పిలుచుకుంటున్నారు. కానీ విజయ్ మాత్రం దేవరకొండ యాడ్ చేశాడు.
దేవరకొండ యాడ్ చేయడంలో తప్పేమీ లేదు. పెళ్లి అయిన తర్వాత ఆడపిల్లకు అత్త వారి ఇంటి పేరు యాడ్ అవ్వడం అనేది కొత్త కాదు. తప్పు కూడా కాదు. కానీ ఇంటి పేరు మార్చుకోకుండా తండ్రి ఇంటి పేరుతోనే సినిమాల్లో నటించే, నిర్మించే జనాలు ఉన్న టాలీవుడ్లో ఈ పేరు మార్పు మాత్రం కొత్తగా అనిపించేదే.
