మాస్ మహారాజ్ రవితేజకి సినిమాలంటే పిచ్చి. అందుకే సినీ నిర్మాణంలో ఏ రోల్ ఇచ్చినా పెర్ఫెక్ట్ గా చేస్తూ స్టార్ హీరోగా ఎదిగారు. అతని కొడుకు మహాధన్ ని కూడా సినిమాలంటే పిచ్చి. తొలి సారిగా అతను కెమెరా ముందుకు వచ్చాడు. రాజా ది గ్రేట్ సినిమాలో చిన్నప్పటి రవితేజ రోల్ పోషించాడు. అతను నటించిన సన్నివేశాలు ఇప్పటివరకు రవితేజ కూడా చూడలేదంట. రేపు ఒకే సారి ఆడియన్స్ మధ్యలో కూర్చొని చూడాలని అనుకున్నట్లు రవితేజ వెల్లడించారు. అయితే తన కొడుకు బాగా నటించి ఉంటాడనే ధీమాని వ్యక్తం చేశారు. అనిల్ రావి పూడి దర్శకత్వంలో తెరకెక్కిన ఈ సినిమా శుక్రవారం ప్రపంచ వ్యాప్తంగా రిలీజ్ కానుంది.
ఈ సందర్భంగా మీడియా ముందుకు వచ్చిన రవితేజ అనేక విషయాలు పంచుకున్నారు. “నాకు తెలియకుండానే రెండేళ్ల గ్యాప్ వచ్చేసింది. ఇక నుంచి ఏడాదికి రెండు సినిమాలను చేస్తాను. అదే విధంగా కథలో కూడా కొంచెం కొత్తదనం ఉండేట్లు చూసుకుంటాను. ఎందుకంటే సినిమా కొత్తగా లేకపోతే ప్రేక్షకులు చూడటం లేదు. రాజా ది గ్రేట్ సినిమా చాలా కొత్తగా ఉంటుంది. తప్పకుండా ఈ సినిమా అన్ని వర్గాల ప్రేక్షకులకు నచ్చుతుంది” అని వెల్లడించారు.
