మాస్ మహారాజ్ రవితేజ 2016లో ఏ సినిమా చేయలేదు. ఈ సంవత్సరం రాజా ది గ్రేట్ తో పలకరించారు. అనిల్ రావి పూడి దర్శకత్వంలో వచ్చిన ఈ మూవీ రవితేజకి మంచి వెల్కమ్ చెప్పింది. భారీ విజయాన్ని అందించింది. ఈ ఉత్సాహంతో రవితేజ చకచకా సినిమాలు చేస్తున్నారు. వచ్చే ఏడాది అతని సినిమాలు ఏకంగా మూడు రిలీజ్ అయ్యేలా ప్లాన్ చేస్తున్నారు. ప్రస్తుతం నూతన దర్శకుడు విక్రమ్ సిరికొండతో “టచ్ చేసి చూడు” సినిమా చేస్తున్నారు. లక్ష్మీ నరసింహ ప్రొడక్షన్స్ పతాకంపై నల్లమలుపు శ్రీనివాస్ (బుజ్జి), వల్లభనేని వంశీ నిర్మిస్తున్న ఈ మూవీ వేగంగా షూటింగ్ జరుపుకుంటోంది.
వక్కంతం వంశీ రాసిన ఈ కథలో మాస్ మహారాజ్ మరోసారి పోలీస్ గా అదరగొట్టనున్నారు. దీని తర్వాత సోగ్గాడే చిన్ని నాయన సినిమాని తెరకెక్కించిన కళ్యాణ్ కృష్ణ దర్శకత్వంలో సినిమా చేయనున్నారు. ఈ సినిమా వచ్చే ఏడాది సెట్స్ మీదకు వెళ్లనుంది. దీని తర్వాత మూవీకి కూడా రవితేజ గ్రీన్ సిగ్నల్ ఇచ్చారు. వరుస అపజయాలతో బాధపడుతున్న శ్రీను వైట్లతో పనిచేయడానికి ఓకే చెప్పారు. ఈ సినిమాని మైత్రి మూవీ మేకర్స్ వారు నిర్మించడానికి ముందుకు వచ్చారు. అమెరికాలో ఎక్కువభాగం షూటింగ్ జరుపుకోనున్న ఈ మూవీ గురించి అధికారిక ప్రకటన తొందర్లోనే రానుంది. సో వచ్చే సంవత్సరం నాలుగు నెలల గ్యాప్ లో మూడు సినిమాలు సందడి చేయనున్నాయి. రవితేజ అభిమానులకు ఇది శుభవార్తే.
