శ్రీను వైట్ల దర్శకత్వంలో రవితేజ ఇలా షాక్ ఇస్తాడంట.. !

నీకోసం, వెంకీ, దుబాయ్ శీను… రవితేజ, శ్రీను వైట్ల కాంబినేషన్లో వచ్చిన సినిమాలు ఇవి. ఈ మూడు బాగా వినోదాన్ని పంచాయి. అందుకే వీరిద్దరి కలయికలో సినిమా అనగానే అభిమానుల్లో అంచనాలు పెరిగిపోతున్నాయి. ఆ అంచనాలకు మించి ఉండాలని శ్రీను వైట్ల కష్టపడుతున్నారు. అమెరికాలో షూటింగ్ జరుపుకుంటున్న ఈ సినిమాకి “అమర్ అక్బర్ ఆంటోనీ” అని పేరు పెట్టిన సంగతి తెలిసిందే. ఇందులో మాస్ మహారాజా త్రి పాత్రాభినయం చేయనున్నట్లు వార్తలు వచ్చాయి. అయితే అతను మూడు పాత్రల్లో కనిపించడం నిజమే కానీ.. ఒక్కరే మూడు పాత్రలున్నట్టు కన్ఫ్యూజ్ చేసి కామెడీ పండిస్తారని ఫిలిం నగర్ వాసులు చెప్పారు.

ఈ ట్విస్ట్ సినిమాలో కీలకమని సమాచారం. ఈ సినిమాలో ముగ్గురు హీరోయిన్స్ ఉండగా.. అందులో ఒకరిగా ఇలియానా కనిపించనుంది. ఈ సినిమాతో ఇలియానా రీ ఎంట్రీ ఇస్తోంది. కిక్ సినిమాతో కిక్ ఇచ్చిన జంట మళ్ళీ ఇందులో ఆకట్టుకోనుంది. అలాగే స్టార్ కమెడియన్ సునీల్ ఈ చిత్రంలో ఫుల్ లెంగ్త్ కామెడీ రోల్ చేయనున్నారు. అంతేకాదు ఈ చిత్రంలో చైల్డ్ ఆర్టిస్ట్ లుగా నిన్నటితరం హీరోయిన్ లయ కుమార్తె శ్లోక, రవితేజ తనయుడు మహాధన్ కనిపించనున్నారు. మైత్రి మూవీ మేకర్స్ వారు ఎక్కడా కాంప్రమైజ్ కాకుండా నిర్మిస్తున్న ఈ సినిమాతో హిట్ ట్రాక్ లోకి రావాలని శ్రీను వైట్ల చూస్తున్నారు.