నేను నోరు విప్పితే తలదించుకుంటారు – రేణు దేశాయ్

పవర్ స్టార్ పవన్ కళ్యాణ్ అభిమానులు, రేణు దేశాయ్ ల మధ్య మాటల యుద్ధం రోజురోజుకి పెరిగిపోతోంది. ఆమె రెండవ వివాహం చేసుకోవడం కొంతమంది ఫ్యాన్స్ కి నచ్చడం లేదు. ఈ విషయంలో పవన్ సంతోషంతో రేణుకి శుభాకాంక్షలు చెప్పారు. అయినప్పటికీ అభిమానులు ఆవేశాన్ని ఆపుకోలేకపోతున్నారు. ట్విట్టర్లో రేణుపై విరుచుకుపడ్డారు. దీంతో ఆమె ట్విట్టర్ ని వదిలి ఇన్ స్ట్రాగ్రామ్ కే పరిమితమయ్యారు. అక్కడకూడా ప్రత్యక్షమై ఆమెకు మనఃశాంతి లేకుండా చేస్తున్నారు. దీంతో రేణు దేశాయ్ ఆగ్రహాన్ని వ్యక్తం చేసారు. పవన్ అభిమానులందరూ అవివేకులని దుయ్యబట్టారు. “విడాకుల వ్యవహారంపై ఇన్నాళ్లు నేను మౌనంగా ఉన్నాను. అలా ఉన్నందుకు పవన్ అభిమానులు కృతజ్ఞతగా ఉండాలి. మర్యాదగా ప్రవర్తించాలి.

విడాకుల వ్యవహారంపై నేను కనుక నోరు విప్పితే అభిమానుల పొగరు మురికి కాలువలో పడి కొట్టుకుపోతుంది. విడాకుల వెనక ఉన్న వాస్తవాలను చెబితే అవివేకులైన పవన్ అభిమానులు తలదించుకోవాల్సి వస్తుంది” అని రేణు ఘాటుగా స్పందించారు. “ఫ్యాన్స్ సలహాలు పాటించాల్సిన అవసరం నాకు లేదు. వారు తిడితే పడాల్సిన అంత తప్పు నేను చేయలేదు. ఇప్పటికైనా మీ సలహాలు, ఏడుపుగొట్టు కథలు చెప్పడం మానుకోండి. ఫ్యాన్స్ కి మంచి బుద్ధి ఇవ్వాలని, నా పని గురించి వచ్చే కామెంట్లను స్వేచ్ఛగా చదువుకునే రోజు రావాలని ప్రార్థిస్తున్నాను” అని రేణు దేశాయ్ చెంప చెళ్లుమనిపించినట్లుగా పోస్ట్ చేశారు. మరి దీని ప్రభావం ఎలా ఉంటుందో చూడాలి.