వర్మ ఒక అద్భుతమైన కథ చెప్పాడు!

“శివ” అనే పేరు వినగానే అందరి కళ్ల ముందు “నాగార్జున సైకిల్ చైన్ లాగే సీన్” ఆటోమేటిక్ గా రోల్ అయిపోతుంది. ఆ సినిమా క్రియేట్ చేసిన ఇంపాక్ట్ అలాంటిది. ఆ తర్వాత కూడా నాగార్జున-వర్మ కాంబినేషన్ లో రెండు మూడు సినిమాలోచ్చినప్పటికీ వాళ్ళ కాంబోలో మాత్రమే కాక తెలుగు సినిమా చరిత్రలోనూ “శివ”దే అగ్ర తాంబూలం. అలాంటి క్లాసిక్ హిట్ ఇచ్చిన నాగార్జున-వర్మ మరోమారు కలిసి వర్క్ చేయబోతున్నారు. ఇదేదో ఫిలిమ్ నగర్ వర్గాల సమాచారం తరహా సోల్లు వార్త కాదు. స్వయంగా కింగ్ నాగార్జున వెల్లడించిన విశేషం.

“రాజుగారి గది 2” ప్రమోషన్స్ లో భాగంగా నేడు మీడియాతో ముచ్చటించిన నాగార్జున తన తదుపరి చిత్రాల గురించి మాట్లాడుతూ.. “రీసెంట్ గా వర్మ కాల్ చేసి ఒక కథ ఉందని చెప్పాడు, వెంటనే వచ్చి కలవమని చెప్పాను. “శివ” కంటే అద్భుతమైన కథ చెప్పాడు. అన్నీ సెట్ అయితే అతి త్వరలోనే అన్నపూర్ణ స్టూడియోస్ బ్యానర్ లోనే సినిమా సెట్స్ కు వెళుతుంది” అంటూ కన్ఫర్మేషన్ ఇచ్చారు నాగార్జున. ఒక స్టోరీ టెల్లర్ గా వర్మ మీద ఎప్పుడు డౌట్ లేదు కానీ ఒక ఫిలిమ్ మేకర్ గా మాత్రం వర్మ తాజా సినిమాల దృష్ట్యా అతడి మీద కాస్త అనుమానం పడుతున్నారు ప్రేక్షకులు. అయితే.. ఎవరేమనుకొన్నా భారతదేశం గర్వించదగ్గ అతికొద్ది మంది దర్శకుల్లో వర్మ పేరు ప్రముఖంగా ఉంటుంది అనడంలో సందేహం లేదు. మరి ఈ సినిమాతో వర్మ కూడా తన స్టామినాను మరోమారు ప్రూవ్ చేసుకొంటాడేమో చూద్దాం.