క్యూట్ సుందరి సమంత త్వరలో యాక్టింగ్ కెరీర్ కి గుడ్ బై చెప్పనుంది. ఈ ఏడాది ఆమె తేరి, 24, ఆ..ఆ సినిమాల ద్వారా భారీ విజయాలను అందుకుంది. ప్రస్తుతం స్యామ్ కొరటాల శివ దర్శకత్వంలో రూపుదిద్దుకుంటున్నజనతా గ్యారేజ్ సినిమాలో యంగ్ టైగర్ ఎన్టీఆర్ సరసన నటిస్తోంది. ఈ చిత్రం ఆగస్టు 12 న రిలీజ్ కానుంది. తర్వాత కళ్యాణ్ కృష్ణ తెరకెక్కించనున్న రొమాంటిక్ లవ్ స్టోరీలో యువ సామ్రాట్ నాగ్ చైతన్య పక్కన నాలుగో సారి నటించనుంది.
“ఏ మాయ చేసావే” చిత్రం ద్వారా మ్యాజిక్ సృష్టించిన ఈ జోడీ.. ఆటోనగర్ సూర్యలో ఆకట్టుకుంది. తర్వాత “మనం” ద్వారా హిట్ కొట్టి హిట్ పెయిర్ అనిపించుకుంది. తెర మీదనే కాదు.. నిజ జీవితంలోను వీరిద్దరూ ఆలుమగలుగా మారేందుకు ముహూర్తం దగ్గర పడుతుండడంతో సమంత కొత్త సినిమాలను ఒప్పుకోవడం లేదు. ఇదివరకు ధనుష్ సినిమాలో నటించేందుకు తీసుకున్న చెక్కును కూడా ఆమె తిరిగి ఇచ్చేసింది.
మామగారు అక్కినేని నాగార్జున ఆజ్ఞ మేరకు ఈ పని చేసినట్లు సమాచారం. అక్కినేని ఇంట కోడలిగా అడుగు పెట్టిన తర్వాత సమంత నటనకు స్వస్తి పలికి .. ఓ సినీ నిర్మాణ సంస్థను నెలకొల్పనున్నట్లు తెలిసింది. ఆ బ్యానర్లో కన్నడ ఫిల్మ్ “యు టర్న్”ని తెలుగులో రీమేక్ చేయనుంది. సమంత పెళ్లి పీటలపై కూర్చునే ముందే హబ్బీ నాగచైతన్య తో కలిసి చివరగా వెండి తెరపై కనిపించేందుకు పనులు వేగంగా సాగుతున్నాయి.
