ఈ డైరెక్టర్ కూడా బాలీవుడ్ లో సెటిల్ అయిపోయేలా ఉన్నాడు

తెలుగు నటీనటులకు, దర్శకనిర్మాతలకు బాలీవుడ్ అనేది ఒక కలల ప్రపంచం. తెలుగులో సూపర్ స్టార్ డమ్ ఎంజాయ్ చేసే హీరోలు మొదలుకొని దర్శకులు వరకూ అందరూ.. అవకాశం వస్తే బాలీవుడ్ లో తమ టాలెంట్ ను ప్రూవ్ చేసుకోవాలని ప్రయత్నిస్తుంటారు. ఇక ఒక్కసారి అక్కడ సక్సెస్ అయ్యారంటే మళ్ళీ టాలీవుడ్ కి రావడానికి పెద్దగా ఆసక్తి చూపించరు. అందుకు ప్రత్యక్ష సాక్షి రాంగోపాల్ వర్మ. సౌత్ ఇండియన్ బిగ్గెస్ట్ డైరెక్టర్ గా హోదాను ఎంజాయ్ చేస్తున్న తరుణంలోనే.. “సత్య” సినిమాతో బాలీవుడ్ ఎంట్రీ ఇచ్చిన వర్మ ఇండియాస్ బిగ్గెస్ట్ డైరెక్టర్ గా ఎదిగి.. అక్కడ జనాలు పట్టించుకోవడం మానేసే వరకు అక్కడే స్థిరపడిపోయాడు.

ఇప్పుడు లేటెస్ట్ సెన్సేషన్ సండీప్ రెడ్డి వంగా కూడా అదే తరహాలో బాలీవుడ్ లో సెటిల్ అయ్యేలా కనిపిస్తున్నాడు. “కబీర్ సింగ్”తో సెన్సేషనల్ హిట్ సొంతం చేసుకొన్న సందీప్ కి బాలీవుడ్ లో వరుస ఆఫర్లు వచ్చాయి. అయితే.. మహేష్ బాబుతో సినిమా అనుకున్నప్పటికీ అది వర్కవుట్ అవ్వకపోవడంతో.. బాలీవుడ్ లో వరుస సినిమాలు నిర్మించేందుకు సన్నద్ధమవుతున్నాడు సండీప్. ఈమేరకు డీలింగ్స్ కూడా పూర్తయ్యాయి. తన అసిస్టెంట్స్ ను దర్శకులుగా పరిచయం చేసేందుకు కూడా సందీప్ సన్నాహాలు చేసుకొంటున్నాడు.