అనౌన్స్‌ చేసిన సమయానికి సినిమా అప్‌డేట్‌ ఇవ్వని కొన్ని టాలీవుడ్‌ ప్రొడక్షన్‌ హౌస్‌ల్లో మైత్రీ మూవీ మేకర్స్‌ కూడా ఒకటి. గతంలో కొన్ని సందర్భాల్లో ఇలా జరిగింది కూడా. ఈ మాట మేం అనేది సోషల్‌ మీడియాలో ఫ్యాన్స్‌ గతంలో ఆగ్రహంతో ఇచ్చిన కాంప్లిమెంట్‌. అయితే ఏమైందో కానీ… ‘సర్కారు వారి పాట’ అప్‌డేట్‌ మాత్రం చెప్పిన సమయానికి చాలా ముందుగా, ఇంకా చెప్పాలంటే 9 గంటల ముందుగా రిలీజ్ చేశారు.
మహేష్‌బాబు పుట్టిన రోజు సందర్భంగా ఈ రోజు (సోమవారం) ఉదయం 9.09కి సినిమా అప్‌డేట్‌ రిలీజ్ చేస్తామని గత కొద్ది రోజులు ఊదరగొడుతూనే ఉన్నారు. రోజుకో పోస్టర్‌, జిఫ్‌, వీడియో… ఇలా ఏదో ఒకటి ఇచ్చి గుర్తు చేస్తూనే ఉన్నారు. దీంతో ఉదయాన్నే తొమ్మిది నుండి హంగామా షురూ చేద్దామని ఫ్యాన్స్‌ కూడా వెయిట్‌ చేశారు. అయితే ఏమైందో తెలియదు కానీ… ఈ రోజు అర్ధరాత్రి 12:34 సమయంలో రిలీజ్ చేసేశారు.
ఉదయాన్నే యూట్యూబ్‌, ట్విటర్‌ ఓపెన్‌ చేసిన వారికి ఆశ్చర్యకరంగా సినిమా టీజర్‌ కనిపించింది. ఇది ఒరిజినలా, లేకపోతే టీజర్‌కి టీజరా అని ఆశ్చర్యపోతూనే చూశారు. అయితే టీజర్‌ మాత్రం అదిరిపోయిందనుకోండి. దీంతో ఫ్యాన్స్‌ ఊహించని సర్‌ప్రైజ్‌ను బాగా ఎంజాయ్‌ చేశారు. ఇదంతా ఓకే… అర్ధరాత్రి 12 అంటే తొమ్మిదో వచ్చిన వెంటనే మైత్రీ మూవీ మేకర్స్‌ టీమ్‌ ‘ఈ రోజు 9.09 కి టీజర్‌’ అని పోస్ట్‌ పెట్టింది. కానీ అక్కడికి 34 నిమిషాలకే రిలీజ్ చేసేసింది. ఏమైంది చెప్మా.
