నవ్వించడం చాలా కష్టం. అందులోనూ వెబ్ సిరీస్లతో నవ్వించడం ఇంకా కష్టం. ఎందుకంటే కాస్త నవ్వులు తగ్గినా జనాలు స్కిప్ కొట్టేస్తారు. నవ్వు రావడం లేదు అనిపిస్తే పూర్తిగా సిరీసే మార్చేస్తారు. అందుకే గ్రిప్పింగ్ ఉండేలా నవ్వులు ఆ సిరీస్లో నింపుకోవాలి. రీసెంట్ టైమ్స్ ఇలాంటి ఓ తెలుగు వెబ్ సిరీస్ అంటే ‘సేవ్ ది టైగర్స్’ (Save the Tigers). ఇప్పటికి రెండు పార్టులుగా వచ్చిన ఈ వెబ్సిరీస్కు మూడో సీజన్ కూడా వస్తుందట. అయితే దానికి కాస్త సమయం పడుతుంది అంటున్నారు.
ఓటీటీల్లో విజయం సాధించాలంటే వెబ్ సిరీస్లకు వ్యూవర్ షిప్ ఎక్కువగా ఉండాలి. ప్రియదర్శి (Priyadarshi) , అభినవ్ గోమఠం (Abhinav Gomatam), చైతన్య కృష్ణ (Krishna Chaitanya) మెయిన్ లీడ్ రోల్స్ చేసిన ‘సేవ్ ది టైగర్స్’ అలాంటి వ్యూవర్ షిప్ సంపాదించి దూసుకుపోతోంది. మిగతా భాషల్లో అనువదించగా అక్కడా అదే స్థాయి ఆదరణ అందుకుంటోంది. దీంతో తమ సిరీస్కు భారీ విజయం అందించిన ప్రేక్షకులకు సిరీస్ రూపకర్త మహి.వి.రాఘవ్ (Mahi V Raghav) థ్యాంక్యూ చెప్పారు. అలాగే కొత్త సీజన్ వివరాలూ తెలిపారు.
‘సేవ్ ది టైగర్స్’, ‘సేవ్ ది టైగర్స్ 2’ సాధించిన విజయం చూసి… టీమ్ మూడో సీజన్ ప్లాన్ చేస్తోందట. ప్రస్తుతం టీమ్ స్క్రిప్ట్ను రెడీ చేసే పనిలో ఉందట. ప్రీ ప్రొడక్షన్ వర్క్స్ పూర్తి చేసుకుని జూన్ నుండి మూడో ‘సేవ్ ది టైగర్స్’ చిత్రీకరణ పనులు షురూ చేస్తారట. ఈ లెక్కన 2025లో ‘సేవ్ ది టైగర్స్’ మూడో సీజన్ను మనం చూసే అవకాశం ఉంటుంది. మరి ఈసారి ఏ స్థాయిలో నవ్విస్తారో చూడాలి.
అనుకోకుండా కలిసిన ముగ్గురు మగాళ్లు స్నేహితులు అవుతారు. భార్యల వల్ల ఇబ్బంది పడుతున్నాం అంటూ కలసిపోతారు. అదే సమయంలో ఆ ముగ్గురు భార్యలు కూడా స్నేహితులు అవుతారు. ఆ తర్వాత వారి మధ్య ఏం జరిగింది, పరిస్థితులు ఎలా మారాయి, దానికి వారేం చేశారు అనేది సిరీస్ మెయిన్ ప్లాట్.
