సల్మాన్ తో బంధం అలాంటిది : శిల్పాశెట్టి

విక్టరీ వెంకటేష్ తో ‘సాహస వీరుడు సాగర కన్య’, మోహన్ బాబుతో ‘వీడెవడండీ బాబు’, నందమురి బాలకృష్ణ తో ‘భలేవాడివి బాసూ’, నాగార్జునతో ‘ఆజాద్’ వంటి చిత్రాలతో తెలుగు ప్రేక్షకుల్ని కూడా ఆకట్టుకుంది బాలీవుడ్ పొడుగు కాళ్ళ సుందరి శిల్పాశెట్టి. ప్రముఖ వ్యాపావేత్త రాజ్ కుంద్రాను పెళ్ళి చేసుకున్న శిల్పాశెట్టి గత కొంత కాలంగా సినిమాలకు దూరంగా ఉంటూ వస్తోంది. ఇదిలా ఉండగా గతంలో శిల్పాశెట్టి బాలీవుడ్ స్టార్ హీరో సల్మాన్ ఖాన్ తో ప్రేమాయణం సాగించినట్టు వార్తలు వచ్చిన సంగతి తెలిసిందే. 1990లలో కండల వీరుడు సల్మాన్ ఖాన్ తో శిల్పా డేటింగ్ చేస్తోందనే వార్తలు ఒక సంచలనమే సృష్టించాయి. పగలు.. రాత్రి అనే తేడా లేకుండా శిల్పాశెట్టి ఇంటకి సల్మాన్ వెళుతుండటంతో… ఏదో జరుగుతోందనే ప్రచారం అప్పట్లో ఓ హాట్ టాపిక్ అయ్యింది. సల్మాన్ – శిల్పా ఇద్దరూ ఈ విషయం పై స్పందించక పోవడంతో ఆ వార్తలకు హద్దు.. అదుపు లేకుండా పోయిందనే చెప్పాలి.

అయితే ఆ విషయం పై శిల్పాశెట్టి తాజాగా ఓ ఇంటర్వ్యూలో స్పందించడం విశేషం. సల్మాన్ కు, శిల్పాశెట్టి తండ్రికి మంచి స్నేహబంధం ఉందనీ… ఇద్దరూ కలసి మందు సిట్టింగ్ వేసేవారని… వారి చనువు అలా ఉండేదని … దీని కోసమే సల్మాన్ తరచుగా శిల్పాశెట్టి ఇంటికి వచ్చి వెళ్ళేవాడిని చెప్పింది. అయితే శిల్పాశెట్టి తండ్రి చనిపోయాక తన ఇంటికి సల్మాన్ ఎప్పుడు వచ్చినా సరే నేరుగా బార్ వద్దకు వెళ్ళి … టేబుల్ పై తల పెట్టి ఏడ్చేవాడని చెప్పుకొచ్చింది. అందరూ అనుకుంటున్నట్టు సల్మాన్ కు, తనకు మధ్య ఎలాంటి ప్రేమ వ్యవహారం జరగలేదని… ఆ రూమర్లు ఇప్పటికీ ఉంటే.. దయచేసి వాని ఆపండి… శిల్పాశెట్టి స్పందించడం హాట్ టాపిక్ గా మారింది