మిస్టర్ పర్ఫెక్షనిస్ట్ గా పేర్కొనే బాలీవుడ్ స్టార్ హీరో ఆమిర్ ఖాన్ (Aamir Khan) హీరోగా నటించి నిర్మించిన తాజా చిత్రం “సితారే జమీన్ పర్” (Sitaare Zameen Par). ఈ సినిమాను ప్రమోట్ చేయడం కోసం ఆమిర్ ఖాన్ చేయని పని లేదు, ఇవ్వని ఇంటర్వ్యూ లేదు. “చాంపియన్స్” అనే స్పానిష్ సినిమా ఆధారంగా తెరకెక్కిన ఈ చిత్రానికి తమిళ దర్శకుడు ఆర్.ఎస్.ప్రసన్న దర్శకత్వం వహించగా.. జెనీలియా ఈ సినిమాలో ఆమిర్ సరసన నటించడం అనేది మరో విశేషంగా నిలిచింది. మరి ఈ చిత్రం ఆడియన్స్ ను ఏమేరకు ఆకట్టుకుంది అనేది చూద్దాం..!!
కథ: ఢిల్లీ బాస్కెట్ బాల్ జూనియర్ కోచ్ గుల్షన్ (ఆమిర్ ఖాన్) ఓ గొడవ కారణంగా ఉద్యోగం నుండి సస్పెండ్ చేయబడి, అదేరోజు తాగి బండి డ్రైవ్ చేస్తూ ఏకంగా పోలీస్ కార్ ను ఢీకొట్టి లైసెన్స్ సస్పెండ్ చేయబడడంతోపాటు.. శిక్షగా స్పెషల్లీ ఎబెల్డ్ కిడ్స్ కి మూడు నెలల పాటు బాస్కెట్ బాల్ ట్రైనింగ్ ఇవ్వాల్సిందిగా కోర్ట్ ఆదేశిస్తుంది.
ఇక వేరే ఆప్షన్ లేక ఆ పిల్లలకు కోచింగ్ ఇవ్వడానికి వెళ్లిన ఆమిర్ ఖాన్ ఎదుర్కొన్న ఇబ్బందులు ఏమిటి? వాళ్ల నుండి అమీర్ ఏం నేర్చుకున్నాడు? వంటి ప్రశ్నలకు సమాధానమే “సితారే జమీన్ పర్” చిత్రం.
నటీనటుల పనితీరు: సాధారణంగా తాను ఉన్న సినిమాల్లో ఆమిర్ ఖాన్ అందరినీ డామినేట్ చేస్తుంటాడు. కానీ.. మొదటిసారి తన సినిమాలో వేరే నటీనటులు డామినేట్ చేయడానికి కి స్కోప్ ఇచ్చాడు. ఆ స్పెషల్ కిడ్స్ ను ఏ విధంగా ఆడిషన్ చేశాడు? ఎక్కడి నుండి తీసుకువచ్చాడు అనేది తెలియదు కానీ.. వాళ్ళందరూ విశేషంగా ఆకట్టుకున్నారు. ముఖ్యంగా వాళ్ల పాత్రల ద్వారా పండే ఎమోషన్స్ ఎంతో హృద్యంగా ఉండడమే కాక మన జీవన విధానం, ఆలోచనాధోరణిని ప్రశ్నించే విధంగా ఉన్నాయి.
ఇక జెనీలియా మంచి పాత్రలో ఎమోషన్స్ & కామెడీ టైమింగ్ తో అలరించింది.
సాంకేతికవర్గం పనితీరు: శ్రీనివాస రెడ్డి సినిమాటోగ్రఫీ డీసెంట్ గా ఉంది. సంగీత త్రయం మంచి బ్యాగ్రౌండ్ స్కోర్ తో ఆకట్టుకున్నారు. సన్నివేశంలోని ఎమోషన్ ను ఎలివేట్ చేయడంలో సక్సెస్ అయ్యారు.
దర్శకుడు ఆర్.ఎస్.ప్రసన్న చాలా పనితనాన్ని కచ్చితంగా మెచ్చుకోవాలి. అంతమంది స్పెషల్లీ ఎబెల్డ్ కిడ్స్ ను మ్యానేజ్ చేసి వాళ్ల నుండి మంచి నటన రాబట్టుకోవడం అనేది మామూలు విషయం కాదు. అలాగే.. చివర్లో గెలవడం ముఖ్యం కాదు.. ఆ ప్రాసెస్ ను ఎంజాయ్ చేయడం ముఖ్యం అంటూ ఇండైరెక్ట్ గా ఇచ్చిన మెసేజ్ మనసుకి హత్తుకుంటుంది.
విశ్లేషణ: మన దైనందన జీవితంలో పరుగుకు అలవాటుపడిన ఈ ప్రాణం చుట్టూ ఉన్న పరిస్థితులను పెద్దగా పట్టించుకోవడం లేదు. చిన్న పిల్లలు కూడా పెద్దవాళ్ళలా బిహేవ్ చేస్తున్న ఈ తరుణంలో పసితనం ఎంత ప్రియమైనది అనేది ఆమిర్ ఖాన్ & ఆర్.ఎస్.ప్రసన్న “సితారే జమీన్ పర్” (Sitaare Zameen Par) సినిమా ద్వారా చెప్పాలనుకున్న విషయం. కచ్చితంగా సినిమా చూస్తున్నప్పుడు ఒక సంతృప్తికరమైన భావన కలుగుతుంది.
ఫోకస్ పాయింట్: కరడుగట్టిన మనసుల్ని హత్తుకునే హృద్యమైన చిత్రం!
రేటింగ్: 3/5
