సంక్రాంతి కానుకగా ప్రేక్షకుల ముందుకు వచ్చి బాక్సాఫీస్ వద్ద మంచి విజయాన్ని అందుకున్న ‘సోగ్గాడే చిన్ని నాయన’ ఇప్పుడు కన్నడలో రీమేక్ కానుంది. ప్రముఖ కన్నడ నటుడు ఉపేంద్ర ఈ రీమేక్ లో నటించనున్నట్లు సమాచారం. ఇప్పటికే ఈ చిత్రానికి సంబంధించిన ప్రీ ప్రొడక్షన్ వర్క్స్ పూర్తి అయ్యాయని..
ఉపేంద్రే ఈ చిత్రానికి దర్శకత్వబాధ్యతలు చేపట్టే అవకాశం ఉందని శాండిల్ వుడ్ వర్గాలు అంటున్నాయి. మరో ఆసక్తి కర విషయం ఏమిటంటే.. రమ్యకృష్ణ పాత్రలో ప్రేమ నటించనుండగా, దాదాపు 17 ఏళ్ల తరువాత ఉపేంద్ర, ప్రేమ జంటగా నటిస్తున్నారు. ఈ చిత్రం జులై నుంచి సెట్స్ పైకి వెళ్ళే అవకాశం ఉంది. కాగా సోగ్గాడే చిన్ని నాయన చిత్రం లో నాగార్జున ద్విపాత్రాభినయంలో నటించగా.. నాగ్ సరసన రమ్యకృష్ణ, లావణ్య త్రిపాఠిలు జంటగా నటించారు.
