హాలీవుడ్ ఆఫర్ల కోసం సోనమ్ ఎదురుచూపులు!!

“హాలీవుడ్ చిత్రాల్లో నటించాలని ప్రయత్నాలు చేస్తున్నాను. ఆడిషన్స్ కూడా జరిగాయి. కానీ, ఇప్పటివరకూ సరైన అవకాశం రాలేదు” అని చెబుతోంది సోనమ్ కపూర్. ఈ ఏడాది అమెరికన్ ఫ్లైట్ ఎక్కిన ఇండియన్ కథానాయికల సంఖ్య ఎక్కువే. ప్రియాంక చోప్రా, దీపికా పదుకొణె, అమైరా దస్తూర్, దిశా పాట్నీ.. ఇలా పలువురు ముంబై భామలు హాలీవుడ్ చిత్రాల్లో నటిస్తున్నారు. ఇటీవల హ్యూమా ఖురేషికి హాలీవుడ్ చిత్రంలో నటించే అవకాశం వచ్చిందని, ఆడిషన్స్ కూడా జరిగాయని ఆమె మేనేజర్ తెలిపాడు. కేన్స్ చలన చిత్రోత్సవాలకు గత ఐదేళ్ల నుంచి సోనమ్ కపూర్ వెళ్తుంది.

వీళ్ళందరి కంటే గుర్తింపూ ఎక్కువే. మరి, మీకు హాలీవుడ్ అవకాశాలు రావడం లేదా? అని అనిల్ కపూర్ ముద్దుల కూతుర్ని ప్రశ్నిస్తే, పైవిధంగా స్పందించింది. దీంతో కొంత విరామం తీసుకుని వెళ్లాలని భావిస్తున్నట్లు తెలిపింది. ఈ ఏడాది విడుదలైన ‘నీరజా’లో సోనమ్ కపూర్ నటనకు మంచి ప్రశంసలు దక్కాయి. దీని తర్వాత మరో చిత్రం ఏదీ అంగీకరించలేదు. గత మూడు నెలలుగా సోనమ్ ఖాళీ. వారసురాలు కాబట్టే కొంత విరామం తీసుకున్నా ఏం పర్వాలేదు కదా? మీకు సులభంగా బ్రేక్ దొరుకుతుంది కదా? అని అడిగితే.. “సరైన పనులు చేయడానికి.. కొంత సమయం ఎదురు చూడడానికి చాలా దమ్ము కావాలి. మా నాన్న దగ్గర్నుంచి రూపాయి కూడా తీసుకొను. అనిల్ కపూర్ కూతుర్ని అయినంత మాత్రన.. ఆయనే నా బిల్స్ అన్నీ కడతారని అనుకోవద్దు. ఆయన కూతురిగా ప్రజల నుంచి ఎక్కువ గౌరవం లభిస్తుంది” అని సోనమ్ కపూర్ తెలిపింది.