మాస్ మహారాజ్ రవితేజ ప్రస్తుతం సోగ్గాడే చిన్ని నాయన, రారండోయ్ వేడుక చూద్దాం సినిమాలని తెరకెక్కించిన కళ్యాణ్ కృష్ణ దర్శకత్వంలో సినిమా చేస్తున్నారు. కామెడీ ఎంటర్ టైనర్ గా తెరకెక్కనున్నఈ సినిమాకి “నేల టికెట్” అని పేరు ఫిక్స్ చేశారు. దీని తర్వాతి సినిమాని కూడా రవితేజ మొదలెట్టారు. శ్రీను వైట్ల దర్శకత్వంలో చేయనున్న సినిమాకి మొన్న పూజా కార్యక్రమాలు చేశారు. అను ఇమ్యానుయేల్ హీరోయిన్ గా ఖరారు అయిన ఈ చిత్రం షూటింగ్ దాదాపు మొత్తం యునైటెడ్ స్టేట్స్ లొనే జరగనుంది. న్యూయార్క్, డెట్రాయిట్, సాల్ట్ లేక్ సిటీ, ఇతర లొకేషన్స్ లో చిత్రీకరించనున్నారు.
స్టార్ కమెడియన్ కమ్ హీరో సునీల్ ఈ చిత్రంలో ఫుల్ లెంగ్త్ కామెడీ రోల్ చేయనున్నారు. అంతేకాదు ఈ చిత్రంలో చైల్డ్ ఆర్టిస్ట్స్ కీలకం కానున్నారు. ఈ పాత్రల్లో ఒకదాన్ని నిన్నటితరం హీరోయిన్ లయ కుమార్తె శ్లోక పోషిస్తుండగా.. మరో ముఖ్యపాత్రలో రవితేజ తనయుడు మహాధన్ కనిపించనున్నాడు. ఇతను ఇదివరకే రాజాధి గ్రేట్ సినిమాలో చిన్నప్పటి రవితేజగా అదరగొట్టాడు. ఇప్పడు మళ్ళీ ఈ చిత్రంలో నటించబోతున్నాడు. “అమర్ అక్బర్ ఆంటోనీ” పేరుతో రోపుదిద్దుకోనున్న ఈ చిత్రాన్ని మైత్రి మూవీ మేకర్స్ వారు ఎక్కడా కాంప్రమైజ్ కాకుండా నిర్మించడానికి సిద్ధంగా ఉన్నారు. ఈ మూవీతో హిట్ ట్రాక్ లో రావాలని శ్రీను వైట్ల శ్రమిస్తున్నారు.
