సినీ పరిశ్రమలో ఒక్క విజయం వస్తే చాలు వారి జీవితం మారిపోతుంది. ఆర్టిస్టులైనా, టెక్నీషియన్స్ అయినా వరుస ఆఫర్లు అందుకొని లైఫ్ సెట్ అయిపోతుంది. కానీ “గంటల వెంకటలక్ష్మి” లైఫ్ మాత్రం అక్కడే ఉంది. ఇంతకీ ఈమె ఎవరు అనుకుంటున్నారా ? రంగస్థలం సినిమాలో “జిగేల్ రాణి” పాట పాడిన సింగర్. రంగస్థలం విజయంలో ఈ పాటకి భాగముంది. ఈ పాటకి డ్యాన్స్ వేసిన పూజా హెగ్డే ప్రభాస్, మహేష్ బాబు, ఎన్టీఆర్ సినిమాల్తో బిజీగా ఉంది. ఈ పాట పాడిన ఆమె మాత్రం కిరాణా కొట్టులో చిల్లర వ్యాపారం చేసుకుంటూనే ఉంది. ఈ విషయం తెలిసిన వారికీ ఎందుకు ఇలా జరిగింది ? అనే సందేహం కలగక మానదు. వివరాల్లోకి వెళితే.. అనకాపల్లికి చెందిన ఈమె ఈ పాటను చెన్నై వెళ్లి పాడి వచ్చింది. కానీ ఆ పాట పాడినందుకు రెమ్యునరేషన్ కూడా దక్కలేదంట.
అంటే సుకుమార్, దేవీ శ్రీ ప్రసాద్ ఇవ్వలేదా? అంటే.. వారు ఇచ్చారు. కానీ ఆమెకు దేవీకి మధ్య నున్న మధ్యవర్తులు ఆ డబ్బుని మింగేసారంట. ఎంతటి ఘోరం. కమ్యూనికేషన్ ఇంతలా పెరిగి ఉన్నప్పటికీ ఇలా మోసపోవడం ఆశ్చర్యాన్ని కలిగిస్తోంది. ఈ విషయాన్నీ ఓ న్యూస్ ఛానల్ వాళ్ళు వెలుగులోకి తెచ్చారు. ఆ విధంగా తెలుసుకున్న సుకుమార్ స్పందించారు. ఆమె పరిస్థిని చూసి విచారం వ్యక్తం చేశారు. రంగస్థలం సినిమా ఈవెంట్స్ కి ఆహ్వానించడానికి ఎన్నిసార్లు ఫోన్లు చేసినా వెంకటలక్ష్మి ఫోన్ కలవలేదని బహుశా మధ్యవర్తులే ఆమెని భయపెట్టి ఉండవచ్చన్నారు. తప్పకుండా వెంకటలక్ష్మికి సాయం చేస్తామని సుకుమార్ హామీ ఇచ్చారు.
