ప్రియాంక జవాల్కర్ స్పీచ్ ను ఆపేసినందుకు కోప్పడుతున్నారు

యాంకర్ సుమ అనే పేరు వినగానే అందరికీ స్వచ్చమైన తెలుగులో అనర్గళంగా, అద్భుతంగా మాట్లాడగల మనిషి మనకు గుర్తొస్తుంది. ఇన్నాళ్లపాటు ఇండస్ట్రీలో ఉన్నప్పటికీ సుమ మీద ఒక్కటంటే ఒక్క నెగిటివ్ న్యూస్ కూడా రాకపోవడం ఆమె గొప్పదనం. అలాంటి సుమ మీద నిన్నటి నుంచి కొందరు మండిపడుతున్నారు. అయితే.. అందుకు కారణం లేకపోలేదు. విషయం ఏంటంటే.. నిన్న జరిగిన “టాక్సీవాలా” ప్రీరిలీజ్ ఈవెంట్ లో హీరోయిన్ ప్రియాంక జవాల్కర్ మాట్లాడుతున్నప్పుడు సగంలోనే సుమ మైక్ లాక్కొని ప్రియాంకను కిందకి పంపేసింది. అందుకు కారణంగా.. అభిమానులు అరుస్తున్నారని చెప్పింది.

అయితే.. నాగబాబు, అల్లు అరవింద్ లాంటి వాళ్ళు మాట్లాడుతున్నప్పుడే అభిమానులు అరుస్తూ రచ్చ రచ్చ చేస్తారు. ఆడియో ఫంక్షన్స్ లో చాలా రెగ్యులర్ గా జరిగే ఇలాంటి విషయం కోసం కొత్తగా ఇండస్ట్రీకి పరిచయమవుతున్న ప్రియాంక లాంటి అమ్మాయి తన స్ట్రగుల్ చెప్పుకొంటున్న తరుణంలో సుమ ఆమె మైక్ ను లాక్కొని ఆమెను కిందకి పంపడంపై కొందరు నెటిజన్లు మండిపడుతున్నారు. సుమ అలా అడ్డుకోకాకుండా ప్రియాంకను స్పీచ్ కంప్లీట్ చేయనిస్తే బాగుండని వ్యాఖ్యానిస్తున్నారు. సుమకి ఇది చెప్పుకోదగ్గ లేక పట్టించుకోవాల్సిన నెగిటివ్ విషయం కాకపోయినా.. ఒక పాపులర్ యాంకర్ అనవసరంగా ఇలా అభాసుపాలవ్వడం మాత్రం బాధాకరం.