ప్రసవ వేదనలు పడుతున్న “ప్రొజెక్ట్ ఎక్స్”

పాపం సందీప్ కిషన్ సింగిల్ హీరోగా హిట్ కొట్టి ఏళ్లవుతోంది. మొన్నామధ్య “శమంతకమణి”తో సూపర్ హిట్ కొట్టినప్పటికీ ఆ క్రెడిట్ మొత్తం చిత్ర దర్శకుడు శ్రీరామ్ ఆదిత్య ఖాతాలోకి వెళ్లిపోవడం, సందీప్ కిషన్ తాజా చిత్రం “కేరాఫ్ సూర్య” డిజాస్టర్ అవ్వడంతో సందీప్ కెరీర్ ఒక్కసారిగా కష్టాల్లో పడింది. చేతిలో ప్రొజెక్ట్స్ ఉన్నప్పటికీ సరైన సక్సెస్ లేకపోవడంతో సందీప్ కిషన్ ను పట్టించుకొనేవారు కరువయ్యారు. ప్రస్తుతం సందీప్ కాన్సన్ ట్రేషన్ మొత్తం “డి 16” డైరెక్టర్ కార్తీక్ నరేన్ దర్శకత్వంలో తాను నటిస్తున్న త్రిల్లర్ మీదే. ఈ సినిమా హిట్టయితే మళ్ళీ మనోడికి కాస్త ఊపిరి దొరుకుతుంది.

అయితే.. సందీప్ కిషన్ హీరోగా తమిళంలో రూపొందిన “మాయావన్” అనే చిత్రం అప్పట్లో సరైన ప్రొడ్యూసర్ లేక రిలీజవ్వలేదు. దాంతో ఆ సినిమా ఆగిపోయిందనే అనుకొన్నారు కూడా. కానీ.. ఇప్పుడు ఆ చిత్రాన్ని ఎట్టిపరిస్థితుల్లోనూ రిలీజ్ చేద్దామని ప్లానింగ్ లో ఉన్నారు తమిళ నిర్మాతలు. తెలుగులో ఈ చిత్రాన్ని “ప్రొజెక్ట్ ఎక్స్” అనే పేరుతో రిలీజ్ చేయనున్నారు. సందీప్ సరసన లావణ్య త్రిపాఠి కథానాయికగా నటించిన ఈ క్రైమ్ థ్రిల్లర్ పై ప్రేక్షకుల్లో అయితే పెద్దగా అంచనాలు లేవు. మరి సందీప్ రంగంలోకి దిగి ఈ సినిమాపై అంచనాలను ఏమైనా పెంచుతాడో లేక ఎలాగో నమ్మకం లేని ప్రొజెక్ట్ కాబట్టి వదిలేస్తాడో చూడాలి.