నాగచైతన్యతో కలిసి సునీల్ నటించిన ‘తడాఖా’ తమిళ సినిమా రీమేక్ అన్నది తెలిసిందే.ఆ సినిమా మోస్తరుగా ఆడి అందరికీ కాసింత మంచి పేరునే మిగిల్చిపోయింది.ఆ అనుభవమో ఏమోగానీ సునీల్ మరో తమిళ సినిమా రీమేక్ చేసేందుకు సిద్ధమయ్యాడు.’ఎనక్కు ఇన్నోరు పేరు ఇరుక్కు’ రీమేక్ లో సునీల్ నటించనున్నాడని టాలీవుడ్ వర్గాల్లో జోరుగా చర్చ జరుగుతోంది.ఇక ఈ సినిమా విషయానికొస్తే.. సంగీత దర్శకుడు జీవీ ప్రకాష్ కుమార్ హీరోగా నటించిన నాలుగో సినిమా ఇది. తొలుత ఈ సినిమాని ‘త్రిష లేదా నయనతార’, ‘పెన్సిల్’ చిత్రాల కోవలోనే అనువదించాలని అనుకున్నారు. తెలుగులో మోషన్ పోస్టర్ కూడా విడుదల చేసారు. అక్కడితోనే తెలుగు వెర్షన్ కి బ్రేకులు పడగా తమిళ వెర్షన్ జూన్ లో విడుదలైంది.
ఇప్పుడు అదే సినిమాని సునీల్ హీరోగా రీమేక్ చేస్తున్నారట.మాతృక నిర్మాతలైన లైకా ప్రొడక్షన్స్ ఈ సినిమాతో టాలీవుడ్ లో అడుగుపెట్టనున్నారు.చిరు రీ ఎంట్రీ సినిమా ఒరిజినల్ కత్తికి నిర్మాతలు కూడా వీరే.’ఖైదీ నెం 150’ని తామే నిర్మిస్తామని పట్టుబట్టిన చరణ్ ఒప్పుకోకపోవడంతో సహ నిర్మాత కార్డు తో సరిపెట్టుకున్నారు. సునీల్ సినిమా వార్త నిజమే అయితే లైకా ప్రొడక్షన్స్ నిర్మిస్తున్న పూర్తిస్థాయి తొలి తెలుగు చిత్రం ఇదే అవుతుంది. అన్నట్టు ‘ఎనక్కు ఇన్నోరు పేరు ఇరుక్కు’ (నాకు ఇంకో పేరుంది) అన్నది రజనీకాంత్ ‘బాషా’ లోని సూపర్ హిట్ డైలాగ్. గుర్తుపట్టారా…?
