ఆరడుగుల అందగాడు ప్రభాస్ కి మామూలుగానే అమ్మాయిల్లో ఫాలోయింగ్ ఎక్కువ. బాహుబలి సినిమాతో ఆ ఫాలోయింగ్ దేశవ్యాప్తంగా విస్తరించింది. తెలుగు హీరోయిన్స్ మాత్రమే కాకుండా బాలీవుడ్ బ్యూటీలు సైతం ప్రభాస్ తో కలిసి ఒక్క సినిమా చేస్తే చాలని కలలుకంటున్నారు. ఈ జాబితా రోజురోజుకి పెరిగిపోతోంది. తాజాగా మరో బ్యూటీ తన మనసులోని కోరికని బయట పెట్టింది. రీసెంట్ గా “వీరే ది వెడ్డింగ్” సినిమాలో ఒక హీరోయిన్ గా నటించి యువకుల మతులు పోగొట్టిన స్వర భాస్కర్.. బాలీవుడ్ హీరోలందరినీ పక్కన పెట్టి ప్రభాస్ తన డ్రీమ్ హీరో అంటోంది. ఉన్నదీ ఉన్నట్టు మాట్లాడి అనేక సార్లు బ్రేకింగ్ న్యూస్ లో నిలిచిన ఈ బ్యూటీ ప్రభాస్ గురించి సంచలన కామెంట్స్ చేసింది. “తెలుగు హీరోల్లో ప్రభాస్ తో నటించాలని చాలా ఆశగా ఉంది.
టాలీవుడ్ లో ఆయనతో కలిసి ఎంట్రీ ఇవ్వాలని కోరుకుంటున్నాను.” అని స్వర స్పష్టం చేసింది. అంతేకాదు.. “ప్రభాస్ తో నటించే అవకాశం ఇస్తే స్క్రిప్ట్ ఏంటని చూడకుండా ఒకే చేస్తాను” అని దర్శకనిర్మాతలకు ఆఫర్ ఇచ్చింది. ఈమె అభిమానం చూస్తుంటే రెమ్యునరేషన్ కూడా తీసుకునేటట్టు లేదు. ప్రస్తుతం ప్రభాస్ సుజీత్ దర్శకత్వంలో సాహో సినిమా చేస్తున్నారు. ఇందులో బాలీవుడ్ బ్యూటీ శ్రద్ధా కపూర్ హీరోయిన్ గా నటిస్తోంది. దీని తర్వాత రాధా కృష్ణ దర్శకత్వంలో మూవీ చేయనున్నారు. ఈ చిత్రంలోనూ పూజా హెగ్డే హీరోయిన్ గా ఫిక్స్ అయింది. మరి ఆ తర్వాత ప్రభాస్ చేయనున్న సినిమాలోనైనా స్వర భాస్కర్ అవకాశాన్ని అందుకుంటుందో, లేదో చూడాలి.
