తమ్ము బేబీకి బంపర్ ఆఫర్

ఒక్క అవకాశం.. హిందీలో సరైన అవకాశం ఒక్కటి వస్తే, నా ప్రతిభ ఎంతుందో? చూపిస్తానని ఎదురు చూస్తున్న తమన్నాకు సరిగ్గా అటువంటి అవకాశమే లభించిందని విశ్లేషకులు అభిప్రాయ పడుతున్నారు. ఈతరం హిందీ కథానాయకుల్లో సూపర్ స్టార్ దక్కించుకున్న యువకుడు రణవీర్ సింగ్. ‘బాజీరావ్ మస్తానీ’తో గతేడాది చివర్లో మంచి విజయం అందుకున్నాడు. రణవీర్ సింగ్ కథానాయకుడిగా రోహిత్ శెట్టి దర్శకత్వంలో ఓ చిత్రం తెరకెక్కనుంది. ఈ చిత్రంలో కథానాయికగా తమన్నాను ఎంపిక చేశారు. దర్శకుడు ఈ వార్తను దృవీకరించారు. తెలుగులో ‘బాహుబలి : ది బిగినింగ్’, ‘బెంగాల్ టైగర్’, ‘ఊపిరి’.. హ్యాట్రిక్ విజయాలతో తమన్నా మంచి జోరు మీదుంది. ‘బాహుబలి’ హిందీ అనువాద చిత్రం వందకోట్ల వసూళ్లు సాధించడంతో పాటు భారీ విజయాన్ని తన ఖాతాలో వేసుకుంది. హిందీలో విడుదలైన తమ్ము బేబీ చివరి చిత్రమిదే. అవంతిక పాత్రలో యువరాణిగా ఉత్తరాది ప్రేక్షకుల్లో మంచి గుర్తింపే దక్కింది. ఇప్పుడు రణవీర్-రోహిత్ శెట్టి చిత్రంలో అవకాశంలో లభించింది. ఇది తమ్ము బేబీకి బంపర్ ఆఫరేనని విశ్లేషకుల మాట. “రణవీర్ సింగ్, వరుణ్ ధావన్, సిద్ధార్థ్ మల్హోత్రాలతో నటించాలని నా కోరిక. వారంతా విభిన్నమైన చిత్రాలు, పాత్రల్లో కనిపించాలని ప్రయత్నిస్తున్నారు” అని తమన్నా హిందీ మీడియా ముందు స్టేట్మెంట్ ఇచ్చిన రెండు నెలల్లో ఈ అవకాశం రావడం గమనార్హం. తమన్నా హిందీలో నటించిన మూడు స్ట్రెయిట్ చిత్రాలూ పరాజయం పాలయ్యాయి. ఈ చిత్రంతో హిట్ అందుకుంటుందో.. లేదో..!!