మా బాధలు ఎవరికీ పట్టవు

“సీత కష్టాలు సీతవి, పీత కష్టాలు పీతవి” అన్నట్లుగా ఎవరి కష్టాలు వాళ్ళకి బరువుగానూ, పక్కవారి ఇబ్బందులు చిన్నగానూ అనిపిస్తుంటాయి. కనిపిస్తుంటాయి. అందుకే ఎవడి సమస్య వాడికి మాత్రమే తెలుస్తుంటుంది. ఉన్నట్లుంది ఈ కష్టానష్టాల గోలేంటి అని ఆలోచిస్తున్నారా? ఈ డైలాగ్ అంటున్నది మేము కాదండోయ్.. మన మిల్క్ వైట్ బ్యూటీ తమన్నా. “స్టార్ హీరోయిన్ అయిపోయారు, మీకేం కష్టాలు ఉంటాయి, అంతా హ్యాపీ లైఫ్ కదా?” అని అడిగిన ఒక ప్రశ్నకు సమాధానంగా “మా హీరోయిన్ల కష్టాలు మీకేం తెలుస్తాయ్” అని సమాధానమివ్వడంతోపాటు.. ఒక రెండు పేజీల ఎక్స్ ప్లేషన్ కూడా ఇచ్చింది తమన్నా.

“షూటింగ్ ఎక్కడైనా, ఎప్పుడైనా సీన్ స్టార్ట్ చేసే గంట ముందే అక్కడ ఉండాలి. కేవలం మేకప్ కోసమే గంటల తరబడి కదలకుండా కూర్చోవాలి, ఒక్కోసారి కంటిన్యూస్ గా రోజుల తరబడి షూట్ చేయాల్సి వస్తుంది. అన్నిటికీ మించి మంచు కొండల్లో చచ్చిపోయేంత చలిలో కూడా సగం సగం బట్టలేసుకొని డ్యాన్స్ చేయాలి. ఫిగర్ కాపాడుకోవడం కోసం ఆకలేసినా తినకుండా ఉంటాం. జిమ్ లో గంటలు గంటలు శ్రమిస్తాం” అవన్నీ హీరోయిన్ గా పేరు తెచ్చుకోవడం కోసం కాదు. వచ్చిన పేరు పాడవ్వకుండా ఉండడం కోసం పడే పాట్లు” అంటూ హీరోయిన్ గా అవ్వాలన్నా, వచ్చిన పేరును కాపాడుకోవాలన్నా ఇన్ని కష్టాలు పడాల్సి వస్తుంది అని వివరించింది తమన్నా.