ధనుష్ హీరోగా తమిళంలో తెరకెక్కనున్న తెలుగు సూపర్ హిట్ చిత్రం.!

కొన్ని సినిమాలు చూసి ఎంజాయ్ చేస్తాం, కొన్ని సినిమాలు చూసి ఆనందిస్తాం.. కానీ అతి తక్కువ చిత్రాలు చూసి సంతృప్తిపడతామ్, సదరు సినిమాలోని పాత్రలో మనల్ని మనం చూసుకుంటాం. ఆ విధంగా ప్రతి ఒక్క ప్రేక్షకుడు తమను తాము చూసుకొని సంతృప్తిపడిన చిత్రం “నీదీ నాదీ ఒకే కథ”. శ్రీవిష్ణు కథానాయకుడిగా వేణు ఉడుగుల దర్శకత్వంలో తెరకెక్కిన ఈ చిత్రం గత శుక్రవారం విడుదలై ప్రేక్షకుల, విమర్శకుల ప్రశంసలు దండిగా అందుకొన్న ఈ చిత్రం కలెక్షన్స్ పరంగానూ గ్రోత్ చూపిస్తోంది.

అయితే.. ఈ సినిమాకి సోషల్ మీడియాలో వస్తున్న అద్భుతమైన స్పందనను గమనించి ఈ చిత్రాన్ని ఇటీవల చూసిన తమిళ టాప్ ప్రొడ్యూసర్స్ లో ఒకరైన కలైపులి ఎస్.థాను కంటెంట్ కి బాగా కనెక్ట్ అయ్యారట. ఇమ్మీడియట్ గా ఈ చిత్రాన్ని తమిళంలో రీమేక్ చేయాలని డిసైడ్ అయ్యారట. ఈ పాత్ర పోషించడానికి ధనుష్ అయితే సరిగ్గా సరిపోతాడని భావించి అతడితో “వి.ఐ.పి 3″గా “నీదీ నాదీ ఒకే కథ” చిత్రాన్ని రీమేక్ చేయాలని ప్లాన్ చేస్తున్నారట.
“పెళ్లి చూపులు, అర్జున్ రెడ్డి” తర్వాత తమిళంలో రీమేక్ అవుతున్న తెలుగు సినిమా “నీదీ నాదీ ఒకే కథ” కావడం, ఈ మూడు చిత్రాల దర్శకులకి అది మొదటి సినిమా అవ్వడం, ఈ ముగ్గురు దర్శకులు వరంగల్ కి చెందినవారు కావడం గమనార్హం.