అడివి శేష్ పై మండిపడ్డ తమ్మారెడ్డి భరద్వాజ

విజయగర్వాన్ని తలకెక్కించుకోకూడదు అనే సత్యాన్ని చాలా తక్కువమంది మాత్రమే తెలుసుకొని జాగరూకతతో వ్యవహరిస్తుంటారు. కానీ.. కొందరు మాత్రం విజయాన్ని బుర్రకు మాత్రమే కాక మనసులోకి కూడా ఎక్కించేసుకొని హడావుడి చేసేస్తూ.. ఇచ్చిన మాటను కూడా ఆ విజయ విహారంలో మరచిపోతుంటారు. అలా అనవసరంగా తిట్లు పడుతున్నాడు అడివి శేష్. ఇటీవల “గూఢచారి”తో బ్లాక్ బస్టర్ హిట్ అందుకొన్న అడివి శేష్ ఈ సినిమాలో ఒక పాత్ర కోసం ప్రముఖ దర్శకనిర్మాత, ఇండస్ట్రీ పెద్దల్లో ఒకరైన తమ్మారెడ్డి భరద్వాజను సంప్రదించడం, అడివి శేష్ వచ్చి అడగడంతో ఆయన ఈ సినిమాలో ఓ చిన్న అతిధి పాత్రలో కనిపించడం జరిగింది.

అయితే.. పాత్ర కోసం అడిగినప్పుడు సినిమా ముందు మీరు చూడాలండీ అదీ ఇదీ అని డైలాగులు చెప్పిన అడివి శేష్ సినిమా స్పెషల్ షోస్ మొదలుకొని రిలీజ్ వరకూ కనీసం ఒక్కసారి కూడా తమ్మారెడ్డికి ఇన్ఫర్మేషన్ కూడా ఇవ్వలేదు.

దాంతో తమ్మారెడ్డికి కోపమొచ్చింది. విజయం సాధించినంత మాత్రాన ఇలా ఎగిరెగిరిపడాల్సిన అవసరం లేదు అంటూ ఇండైరెక్ట్ గా సెటైర్స్ వేస్తున్నారు. మరి ఇవాళ సాయంత్రం జరగబోయే సక్సెస్ మీట్ లో అయినా అడివి శేష్ మైకు అందుకొని తమ్మారెడ్డి భరద్వాజ కోపాన్ని కరిగిస్తాడో లేక ఎప్పట్లానే ఆ విషయాన్ని లైట్ తీసుకొని ఆయన మనసులో ఎప్పటికీ గర్వంతో రంకెలేసిన యువ కథానాయకుడిగా నిలిచిపోతాడో చూడాలి.