ఎన్టీఆర్, త్రివిక్రమ్ సినిమా ఛాన్స్ పై స్పందించిన థమన్

తెలుగు సినీ పరిశ్రమలోని ప్రముఖ సంగీత దర్శకుల్లో ఎస్ ఎస్ థమన్ ఒకరు. కిక్, దూకుడు, రేసుగుర్రం, సరైనోడు వంటి బ్లాక్ బస్టర్ సినిమాలకు సంగీతమందించారు. రీసెంట్ గా అతను మ్యూజిక్ అందించిన “భాగమతి”, “తొలిప్రేమ” సినిమాలు సూపర్ హిట్ అయ్యాయి. ఈ విజయాలకంటే ఎన్టీఆర్, త్రివిక్రమ్ సినిమాకి మ్యూజిక్ ఇచ్చే ఛాన్స్ వచ్చినందుకే థమన్ ఎక్కువగా సంతోషపడుతున్నారు. ఈ విషయాన్నీ స్వయంగా ఆయనే చెప్పారు. రీసెంట్ గా ఓ జాతీయ మీడియాకి ఇచ్చిన ఇంటర్వ్యూ లో థమన్ మాట్లాడుతూ..

“త్రివిక్రమ్‌ సినిమాకు సంగీతమందించడం అనేది నా కల. తాజాగా ఎన్టీఆర్‌ తో త్రివిక్రమ్ చేస్తున్న సినిమాకు సంగీతం అందించడం ద్వారా నా కల నిజం అవుతోంది. త్రివిక్రమ్‌ అద్భుతమైన కథను సిద్ధం చేశారు. ఇదివరకు తారక్‌ సినిమాలు “బృందావనం”, “బాద్‌షా”, “రభస” సినిమాలకు సంగీతం అందించాను. అయినా ఈ సినిమా పనులు మొదలు పెట్టాలని ఆతృతగా ఉంది’ అని అన్నారు. హారిక అండ్ హాసిని క్రియేషన్స్ బ్యానర్లో రాధా కృష్ణ నిర్మిస్తున్న ఈ సినిమా వచ్చే నెలలో సెట్స్ మీదకు వెళ్లనుంది. ఇందులో ఎన్టీఆర్ సరసన డీజే పాప పూజా హెగ్డే, బాలీవుడ్ బ్యూటీ శ్రద్ధ కపూర్ లు రొమాన్స్ చేయనున్నారు.