అతి తక్కువ ధర పలికిన గీత గోవిందం శాటిలైట్ రైట్స్

ఈ ఏడాది సంచలనం సృష్టించిన సినిమాల జాబితాలో ఆర్ఎక్స్ 100, గీత గోవిందం సినిమాలు తప్పకుండా ఉంటాయి. ఒకటి రెండు కోట్లతో నిర్మితమై 20 కోట్లు వసూలు చేస్తే మరొకటి 14 కోట్లతో తెరకెక్కి వందకోట్ల క్లబ్ లో చేరిపోయింది. విజయ్ దేవర కొండ “గీత గోవిందం” సినిమాతో అనేక రికార్డులను కొల్లగొట్టారు. అటువంటిది ఆర్ఎక్స్ 100 మూవీని బీట్ చేయకపోవడం ఏమిటి ? అనే సందేహం కలుగుతుంది కదూ.. అక్కడికే వస్తున్నాం.. ఎందులో బీట్ చేయలేదంటే.. శాటిలైట్ రైట్స్ విషయంలో ఆర్ఎక్స్ 100 ని గీత గోవిందం అందుకోలేకపోయింది. గీత గోవిందం శాటిలైట్ రైట్స్ కేవ‌లం కోట‌న్న‌ర‌కే ఓ ఛానెల్ ద‌క్కించుకుంది. ఆర్ఎక్స్ 100 శాటిలైట్ రైట్స్ ఐదుకోట్లుపలికింది.

గీతా ఆర్ట్స్ బ్యానర్ వాళ్ళు అన్నివిషయాల్లో చాలా ప్లాన్ తో ఉంటారు. కానీ ఈ శాటిలైట్ విషయంలో దెబ్బతిన్నారు. సినిమా రిలీజ్ కి ముందే శాటిలైట్ రైట్స్ అమ్మేయడం వల్ల దాదాపు నాలుగు కోట్ల నష్టాన్ని చవిచూశారు. ఎటువంటి స్టార్ హీరో, హీరోయిన్ , డైరక్టర్ లేని మూవీ  ఆర్ఎక్స్ 100 శాటిలైట్ రైట్స్ ని ఐదు కోట్లకు అమ్ముడు పోయింది. ఈ విషయంలో అశ్వినీదత్ జాగ్రత్త పడ్డారు. మహానటి చిత్రాన్ని రిలీజ్ కి ముందే కొనేందుకు ముంచుకొచ్చినప్పటికీ ఇవ్వలేదు. సినిమా విజయం సాధించిన తర్వాత 15 కోట్లకు అమ్మి బడ్జెట్ మొత్తాన్ని శాటిలైట్ రూపంలోనే రాబట్టి ఔరా అ నిపించారు. గీత గోవిందం దెబ్బకి ఇక నుంచి నిర్మాతలందరూ జాగ్రత్తగా ఉంటారని ట్రేడ్ వర్గాలవారు చెప్పుకుంటున్నారు.