బాబు నిజంగానే బంగారం !!

సినిమా ఇండస్ట్రీలో ఫ్యాన్స్ లేని హీరోలన్నా ఉంటారేమో కానీ.. హేటర్స్ లేని హీరోస్ ఉండరు అని కొందరు అనుకొంటుంటారు. కానీ.. వయోబేధం లేకుండా అన్నివర్గాల ప్రేక్షకుల్ని ప్రత్యక్షంగానో లేక పరోక్షంగానో తన అభిమానులుగా మార్చుకొని, గొడవలకు-గాసిప్స్ కి చాలా దూరంగా ఉంటూ “పర్ఫెక్ట్ ఫ్యామిలీ హీరో” అనిపించుకొన్న ఒకే ఒక్క స్టార్ హీరో విక్టరీ వెంకటేష్. ఇండస్ట్రీలోనే కాదు బయట కూడా వెంకటేష్ అంటే పడనివారు ఎవరూ ఉండరని చెప్పడంలో అతిశయోక్తి లేదు. పర్సనల్ ఇంటర్వ్యూలు ఇస్తున్నప్పుడు కేవలం సినిమా గురించి నాలుగు మాటలు చెప్పేసి “ఒకేనా” అనేసి వెళ్ళిపోకుండా.. మీడియా మిత్రులతో సన్నిహితంగా ఉంటూ వారి బాగోగుల గురించి ప్రతి ఒక్కరినీ పేరుపేరునా అడిగే వెంకటేష్ అంటే పాత్రికేయులకూ ప్రియమే.

ఇక “సార్ నేను మీ అభిమానిని” అంటూ అభిమానంతో రామానాయుడు స్టూడియోకి ఎవరోచ్చినా సరే “బాగున్నావా అమ్మా” అంటూ భుజం మీద చెయ్యేసి ఆప్యాయంగా పలకరించే వెంకీని చూస్తే చాలు ఆ అభిమాని కొన్ని వందల, వేల కిలోమీటర్ల నుంచి రావడానికి ప్రడిన శ్రమ మొత్తం మటుమాయమైపోతుంది.తన కెరీర్ లో ఎక్కువగా చేసింది రీమేక్ సినిమాలే అయినా.. ప్రతి రీమేక్ లోనూ తనదైన మార్క్ ను చూపించి “ఇది రీమేకా ?!” అని ప్రేక్షకులు అవాక్కయ్యేలా చేయడం వెంకీ స్పెషాలిటీ. ప్రస్తుతం వెంకీ నటిస్తున్న “గురు” సినిమానే అందుకు నిదర్శనం.

హిందీ సినిమా “సాలా కడూస్”కు రీమేక్ గా తెరకెక్కుతున్న ఈ సినిమాలో వెంకీ లుక్ అందర్నీ అమితాశ్చర్యానికి గురి చేస్తుంది.నేడు (డిసెంబర్ 13) వెంకటేష్ జన్మదినం. 55 ఏళ్ల వెంకటేష్ ను చూస్టే “నిజంగా ఆయనకు 55 ఏళ్ళా” అని ఆశ్చర్యపడక తప్పదు. బంగారం లాంటి వెంకటేష్ బాబు తన జన్మదిన వేడుకలను కుటుంబ సభ్యులతో కలిసి గోవాలో జరుపుకొంటున్నారు. ఈ సందర్భంగా “ఫిల్మీ ఫోకస్” విక్టరీ వెంకటేష్ కి జన్మదిన శుభాకాంక్షలు తెలుపుతూ.. ఆయన తాజా చిత్రం “గురు” సూపర్ హిట్ అవ్వాలని కోరుకొంటోంది!

Also, do SUBSCRIBE to our YouTube channel to get latest Tollywood updates.