ఫేమస్ నవలతో క్రిష్ సినిమా..?

November 10, 2020 / 02:42 PM IST

Join Us

ఫేమస్ అయిన నవలల ఆధారంగా ఇప్పటికే చాలా సినిమాలు వచ్చాయి. ఈ మధ్యకాలంలో నవలా చిత్రాల హవా కాస్త పెరుగుతున్నట్లు కనిపిస్తోంది. ఇప్పటికే దర్శకుడు క్రిష్ ‘కొండపొలెం’ నవల ఆధారంగా సినిమా తీస్తున్నాడు. వైష్ణవ్ తేజ్, రకుల్ ప్రీత్ సింగ్ జంటగా నటిస్తోన్న ఈ సినిమా ప్రస్తుతం షూటింగ్ దశలో ఉంది. క్రిష్ మాదిరి దర్శకుడు ఇంద్రగ్రంటి మోహన్ కృష్ణ కూడా ‘శప్తభూమి’ అనే నవల ఆధారంగా వెబ్ సిరీస్ నిర్మించే ఆలోచన చేస్తున్నారు. అలానే కొన్ని పాత నవలలు ఇప్పుడు సినిమాలుగా రూపాంతరం చెందుతున్నాయి.

ఈ క్రమంలో ‘అతడు అడవిని జయించాడు’ అనే నవల ఆధారంగా ఓ సినిమా తీసే అవకాశాలు ఉన్నాయని సమాచారం. తెలుగు నవలా ప్రపంచంలో ఉత్తమ రచనల్లో ‘అతను అడవిని జయించాడు’ చెప్పుకోదగ్గది. కేశవరెడ్డి రచించిన ఈ నవల ఎన్నో అవార్డులను అందుకుంది. అడవికి, మనిషికి, మనిషికి మృగానికి, మనిషికి ఆకలికి మధ్య జరిగిన పోరే ఈ నవల. దీని ప్రకారం.. తన పందిపిల్ల తప్పిపోవడంతో దానిని వెతుక్కుంటూ ఓ ముసలివాడు అడవిలోకి వెళ్తాడు. అక్కడ ఏమైందనే ఇతివృత్తం ఆధారంగా ఈ కథ సాగుతుంది. నిజానికి దర్శకుడు క్రిష్ ఈ కథతో ముందే ఓ సినిమా తీయాలనుకున్నారు. కానీ కుదరలేదు.

ఆ తరువాత ఆయన దృష్టి ‘కొండపొలెం’ మీద పడి.. ఆ కథతో సినిమా తీస్తున్నాడు. ఈ సినిమా గనుక సక్సెస్ అయితే ‘అతడు అడవిని జయించాడు’ నవల ఆధారంగా సినిమా తీయాలని క్రిష్ ప్లాన్ చేస్తున్నాడు. ప్రస్తుతం క్రిష్.. పవన్ కళ్యాణ్ హీరోగా సినిమా చేస్తున్నాడు. ఈ సినిమా షూటింగ్ కి గ్యాప్ రావడంతో క్రిష్ స్క్రిప్ట్ మీద వర్క్ చేస్తున్నాడు.