Trivikram: మహేష్ ‘అతడు’ ‘ఖలేజా’ కి ఎలా ఉన్నారో.. ‘గుంటూరు కారం’ కి కూడా అలాగే ఉన్నారు: త్రివిక్రమ్

January 10, 2024 / 10:51 AM ISTByFilmy Focus

Join Us

Trivikram: మహేష్ ‘అతడు’ ‘ఖలేజా’ కి ఎలా ఉన్నారో.. ‘గుంటూరు కారం’ కి కూడా అలాగే ఉన్నారు: త్రివిక్రమ్

‘ఒక సినిమాకి వంద శాతం పని చేయమంటే రెండు వందల శాతం పనిచేసే హీరో మహేష్ బాబు’ అంటూ తన శైలిలో గొప్పగా వర్ణించారు త్రివిక్రమ్ శ్రీనివాస్. ఈరోజు గుంటూరులో జరిగిన ‘గుంటూరు కారం’ ప్రీ రిలీజ్ ఈవెంట్లో త్రివిక్రమ్ చెప్పిన మాటలు ఇవి. త్రివిక్రమ్ మాట్లాడుతూ.. “ఈరోజు గుంటూరు రావడానికి రెండు కారణాలు ఉన్నాయి. ఒకటి ఈ సినిమా పేరు గుంటూరు కారం. రమణగాడు మీ వాడు, మనందరి వాడు. అందుకని మీ అందరి మధ్యలో ఈ ఫంక్షన్ చేయాలని అనుకున్నాం.

చాలారోజుల షూటింగ్ తర్వాత విపరీతంగా అలిసిపోయి కూడా మీ అందరినీ కలవడం కోసం గుంటూరుకి రావడం జరిగింది. రెండో కారణం.. సూపర్ స్టార్ కృష్ణ గారు తెలుగు సినిమాలో విడదీయలేని ఒక అంతర్భాగం. అలాంటి ఒక గొప్ప మహానటుడు, ఒక గొప్ప మనిషి. ఆయనతో నేను సినిమా చేయలేదు కానీ, ఆయన నటించిన ఒక సినిమాకి పోసాని గారి దగ్గర అసిస్టెంట్ రైటర్ గా పనిచేశాను. ఆయనతో డైరెక్ట్ గా పరిచయం కలిగినటువంటి సందర్భం అదొక్కటి మాత్రమే.

ఆ తర్వాత నేను అతడు, ఖలేజా సినిమాలు తీసినప్పుడు ఆయనతో మాట్లాడటం, ఆయనతో గడిపిన ప్రతిక్షణం కూడా నాకు చాలా చాలా అపూర్వమైనది, అమూల్యమైనది. అంత గొప్ప మనిషికి పుట్టినటువంటి మహేష్ గారు ఇంకెంత అదృష్టవంతుడో అని అప్పుడప్పుడు అనిపిస్తూ ఉంటుంది. ఒక సినిమాకి వంద శాతం పని చేయాలంటే రెండొందల శాతం పనిచేసే హీరో ఎవరైనా ఉన్నారా అంటే అది మహేష్ గారు.

ఇది చెప్పడంలో మాత్రం తెలుగు ఇండస్ట్రీలో ఎవ్వరూ కూడా వెనక్కి తిరిగి చూడరు. నేను ‘అతడు’ సినిమాకి పని చేసినప్పుడు ఎలా ఉన్నారో, ‘ఖలేజా’కి పని చేసినప్పుడు ఎలా ఉన్నారో… ‘గుంటూరు కారం’ కి కూడా అలాగే ఉన్నారు. 25 సంవత్సరాలైంది అంటున్నారు కానీ, నాకు మాత్రం నిన్న మొన్న పరిచయమైన హీరోలాగే కనిపిస్తున్నారు. చూడటానికి అంత యంగ్ గా ఉన్నారు. మనసులోనూ అంతే యంగ్ గా ఉన్నారు.

పర్ఫామెన్స్ లో కూడా అంత నూతనంగా, అంత యవ్వనంగానే ఉన్నారు. ఆయనకు మరిన్ని వసంతాలు ఉండాలని, కృష్ణ గారి తరపున మీరందరూ ఆయన వెనక ఉండాలని, ఆయన్ని ఆశీర్వదించాలని మనస్ఫూర్తిగా కోరుకుంటూ జనవరి 12 న థియేటర్లలో కలుద్దాం. ఈ సంక్రాంతిని చాలా గొప్పగా జరుపుకుందాం. ఆనందంగా జరుపుకుందాం. రమణగాడితో కలిసి జరుపుకుందాం” అంటూ చెప్పుకొచ్చారు.