కొన్నేళ్ల క్రితం ఋతువుల్లా సంవత్సరానికి ఆరేసి సినిమాలతో అలరించిన అల్లరి నరేష్ ప్రస్తుతం స్కూల్ పిల్లల పరీక్షల్లా క్వార్టర్లీ, హాఫ్యర్లీ అంటూ రెండు మూడు సినిమాలతోనే సరిపుచ్చుతున్నాడు. వాటిలో ప్యాస్ మార్కులు తెచ్చుకోవడానికి అతడు పడుతున్న కష్టాలు అన్నీ ఇన్నీ కావు. ఇలాంటి పరిస్థులలో ఎవరైనా దేవున్ని ప్రార్థిస్తారు. ఇతగాడు మాత్రం ఓ దెయ్యాన్ని నమ్ముకున్నాడు. వివరాల్లోకి వెళితే..
నాగేశ్వర రెడ్డి దర్శకత్వంలో అల్లరి నరేష్ నటిస్తోన్న తాజా చిత్రం ‘ఇంట్లో దెయ్యం నాకేం భయం’. బి.వి.ఎస్.ఎన్ ప్రసాద్ నిర్మిస్తోన్న ఈ చిత్రం రెండు పాటల మినహా చిత్రీకరణ పూర్తి చేసుకుంది. త్వరలో వాటి చిత్రీకరణ పూర్తి చేయడంతో పాటు పోస్ట్ ప్రొడక్షన్ పనులు ముగించుకొని దసరా విడుదలకు సిద్ధం చేస్తున్నట్టు చిత్ర బృందం ప్రకటించారు. నరేశ్-నాగేశ్వర రెడ్డి కలయికలో వచ్చిన ‘సీమశాస్త్రి’, ‘సీమ టపాకాయ్’ చిత్రాల సరసన ఈ సినిమా నిలుస్తుందని దర్శకుడు నమ్మకంగా వున్నాడు. ఈ దెయ్యం అల్లరోడి ఫ్లాపుల భయాన్ని పోగొడుతుందంటారా..?
