ఒకే రోజు ఆరు సినిమాలు!!

ప్రతి శుక్రవారం బాక్సాఫీస్ వద్ద రెండు లేదా మూడు చిత్రాలు విడుదల అవుతుండగా.. గడచిన రెండు వారాల్లో ఒక్కో వారంలో ఎనిమిది చిత్రాలు బాక్సాఫీస్ వద్ద విడుదల అయ్యాయి. ఇన్ని చిత్రాలు విడుదలయినప్పటికీ.. ఈ వారం కూడా మరో ఆరు చిత్రాలు ప్రేక్షకుల ముందుకు వస్తున్నాయి. వాటిలో ఎప్పటి నుంచో వాయిదా పడుతూ వస్తున్న విశాల్ కథకళి ఉండగా, నారాయణ మూర్తి నటించిన దండకారణ్యం, శివాజీ ప్రధానపాత్రలో మూడుగంటల చిత్రాన్ని సింగిల్ షాట్ లో తెరకెక్కించిన ‘సీసా’,  ప్రతి కుటుంబంలోనూ జరిగిన సంఘటనలతో సస్పెన్స్ థ్రిల్లర్ గా తెరకెక్కిన దృశ్యకావ్యం, బాలకృష్ణ చేతుల మీదుగా గీతాలావిష్కరణ జరిగిన సతీ తిమ్మమాంబతో పాటు రొమాన్స్ విత్ ఫైనాన్స్ అనే ఆరు చిత్రాలు విడుదల అవుతున్నాయి. సూర్య నటించిన మేము చిత్రం కూడా ఈ వారమే విడుదల కావాల్సి ఉండగా పలు కారణాల రిత్యా ఈ చిత్రం వాయిదా పడింది.

ఈ వారం ఆరు చిత్రాలు విడుదల అవుతున్నప్పటికీ ఇన్ని చిత్రాలు విడుదల అవుతున్నట్లు ప్రేక్షకులకు తెలిసే అవకాశం లేదని సినీ అభిమానులు అంటున్నారు. నిర్మాతలు చిత్ర ప్రమోషన్స్ లో తగిన జాగ్రత్తలు తీసుకుంటే .. సినీ ప్రేక్షకులకు చిన్న చిత్రాలు సైతం చేరువయ్యేలా ఉంటాయని వారు అభిప్రాయపడుతున్నారు.