సినీ కథ రచయితగా అనేక సూపర్ హిట్స్ అందుకున్న వక్కంతం వంశీ డైరక్టర్ గా మారి అల్లు అర్జున్‌ తో “నా పేరు సూర్య నా ఇల్లు ఇండియా” తీశారు. భారీ అంచనాలతో వచ్చిన ఈ సినిమా.. ఆ అంచనాలను అందుకోలేకపోయింది. దీంతో అతనితో సినిమా అంటే చాలామంది భయపడుతున్నారు. అందుకే వంశీ ఎవరితో సినిమాచేస్తారని అందరూ ఆసక్తిగా ఎదురుచూసారు. తాజాగా అతను రవితేజతో మూవీ చేయబోతున్నారని తెలిసింది. రవితేజకి కిక్ వంటి సూపర్ హిట్ కథని వంశీ అందించారు. ఆ తర్వాత కిక్ 2 , టచ్ చేసి చూడు సినిమాలకు కూడా కథని అందించారు.
ఆ పరిచయంతోనే రవితేజ వక్కంతం వంశీ కి ఒకే చెప్పినట్లు ఫిలిం నగర్ వాసులు చెప్పారు. మాస్ మహారాజ శ్రీను వైట్లతో “అమర్ అక్బర్ ఆంటోనీ” అనే చిత్రాన్ని చేస్తున్నారు. ఈ సినిమా షూటింగ్ ప్రస్తుతం హైదరాబాద్ లో సాగుతోంది. ఇలియానా, రవితేజలపై ఓ సాంగ్ ని చిత్రీకరిస్తున్నారు. ఈ సినిమా తర్వాత సంతోష్‌ శ్రీనివాస్‌ దర్శకత్వంలో మూవీ చేయనున్నారు. ఇది తమిళంలో హిట్ సాధించిన ‘తెరి’కి రీమేక్‌. దీని తర్వాత వక్కంతం వంశీ ప్రాజక్ట్ పట్టాలెక్కించనున్నారు. డైరక్టర్ గా మొదటి సినిమా దెబ్బ కొట్టడంతో రెండో సినిమాతో ఎలాగైనా హిట్ ట్రాక్ లోకి రావాలని వక్కంతం భావిస్తున్నారు.
