Varanasi : ‘వారణాసి’ నుంచి బిగ్ అప్డేట్.. షూటింగ్ ముగింపు ఎప్పుడో చెప్పేసిన రాజమౌళి!

టాలీవుడ్ సూపర్ స్టార్ మహేష్ బాబు, దర్శకధీరుడు ఎస్.ఎస్. రాజమౌళి కాంబినేషన్‌లో తెరకెక్కుతున్న ప్రతిష్టాత్మక చిత్రం ‘వారణాసి’ షూటింగ్ శరవేగంగా కొనసాగుతోంది. ఇప్పటికే ఈ సినిమాపై దేశవ్యాప్తంగా భారీ అంచనాలు నెలకొనగా, తాజాగా దర్శకుడు రాజమౌళి చెప్పిన మాటలు అభిమానుల్లో మరింత ఉత్సాహాన్ని నింపాయి. సినిమా నిర్మాణం కీలక దశకు చేరుకుందని ఆయన వెల్లడించడంతో ప్రాజెక్ట్‌పై కొత్త చర్చ మొదలైంది.

Varanasi

తాజా ఇంటర్వ్యూలో రాజమౌళి మాట్లాడుతూ, చిత్రానికి సంబంధించిన ప్రధాన భాగం ఇప్పటికే పూర్తైందని తెలిపారు. ముఖ్యంగా భారీ స్థాయిలో ప్లాన్ చేసిన యాక్షన్ సీక్వెన్స్‌లు, విజువల్ స్పెక్టకిల్ ఎపిసోడ్‌ల చిత్రీకరణ విజయవంతంగా ముగిసిందని వెల్లడించారు. ప్రస్తుతం కథను అనుసంధానించే కీలక సన్నివేశాలు, పాత్రల మధ్య జరిగే ఎమోషనల్ సీన్ల చిత్రీకరణ జరుగుతోందని చెప్పారు.

అన్ని అనుకున్నట్లుగా సాగితే సెప్టెంబర్ చివరి నాటికి లేదా అక్టోబర్ తొలి వారాల్లో మొత్తం షూటింగ్ పూర్తయ్యే అవకాశముందని రాజమౌళి పేర్కొన్నారు. దీంతో చిత్రీకరణ చివరి దశలోకి ప్రవేశించిన ఈ భారీ ప్రాజెక్ట్‌పై అభిమానుల్లో మరింత ఆసక్తి పెరిగింది. అడ్వెంచర్, యాక్షన్, మైథాలజీ అంశాల కలయికలో రూపొందుతున్న ఈ చిత్రంలో మహేష్ బాబు సరికొత్త అవతార్‌లో కనిపించనున్నారని ఇప్పటికే ప్రచారం జరుగుతోంది. బాలీవుడ్ స్టార్ ప్రియాంకా చోప్రా హీరోయిన్‌గా నటిస్తుండగా, మలయాళ స్టార్ పృథ్వీరాజ్ సుకుమారన్ కీలక పాత్రలో కనిపించనున్నట్లు సమాచారం. అలాగే హాలీవుడ్ సాంకేతిక నిపుణులు కూడా ఈ ప్రాజెక్ట్‌లో భాగస్వామ్యం కావడంతో సినిమా నిర్మాణ విలువలు అంతర్జాతీయ స్థాయిలో ఉండబోతున్నాయని సినీ వర్గాలు చెబుతున్నాయి.

ప్రస్తుతం షూటింగ్ చివరి దశకు చేరుకోవడంతో త్వరలోనే టీజర్, ఫస్ట్ లుక్ లేదా ఇతర అధికారిక అప్డేట్లు వచ్చే అవకాశముందని అభిమానులు ఆశాభావం వ్యక్తం చేస్తున్నారు. మహేష్ బాబు – రాజమౌళి కాంబినేషన్‌లో రూపొందుతున్న ఈ సినిమా భారతీయ సినీ పరిశ్రమలో మరో మైలురాయిగా నిలుస్తుందనే అంచనాలు ఇప్పటికే బలంగా వినిపిస్తున్నాయి.

Idupukayitham : సబ్ టైటిల్స్ లో చూసే మలయాళం సినిమాలు అర్ధం అవుతాయి కానీ “ఈడుపు కాయితం” అనే తెలుగు టైటిల్ అర్ధం అవట్లేదంట !