విభిన్న కథలను ఎంచుకుని విజయాలను సొంతం చేసుకుంటున్నారు విక్టరీ వెంకటేష్. దృశ్యం, గోపాల గోపాల వంటి హిట్ల తర్వాత “బాబు బంగారం”గా నవ్వించడానికి సిద్ధమయిపోయారు. ఈ సినిమా ఈనెల 12 న రిలీజ్ కానుంది. ఈ చిత్రం విడుదల కాక ముందే తర్వాత సినిమా కోసం వెంకీ కసరత్తు ప్రారంభించారు. హిందీ సూపర్ హిట్ సినిమా సాలా ఖండూస్ ని తెలుగులో రీమేక్ చేయడానికి సన్నాహాలు జరుగుతున్నాయి. ఇందులో వెంకటేష్ బాక్సర్ కోచ్ రూపాన్ని పొందడానికి ఎక్కువ సమయం జిమ్ ల్లో గడుపుతున్నారు.
ఈ చిత్రం సెట్స్ మీదకు వెళ్లకముందే బాబు కోసం మరో కథ రెడీ అయింది. యాంకర్ నుంచి డైరక్టర్ గా మారిన ఓంకార్ వెంకటేష్ కోసం ఒక హారర్ కామెడీ కథను సిద్ధం చేసినట్లు తెలిసింది. ఆయన చేసిన గత చిత్రం “రాజు గారి గది” మంచి లాభాలను ఆర్జించింది. ఇప్పుడు అటువంటి కాన్సెప్ట్ ని ఓంకార్ నిర్మాత సురేష్ బాబుకి వినిపించారట. అతనికి బాగా నచ్చడంతో వెంకటేష్ హీరోగా తానే నిర్మిస్తానని చెప్పినట్లు ఫిలిం నగర్ సమాచారం. పూర్తి గా స్క్రిప్ట్ మొత్తం సిద్ధం చేసిన ఓంకార్ త్వరలో వెంకటేష్ ని డైరక్ట్ చేయనున్నారు. సాలా ఖండూస్ చిత్రం పూర్తి అయినా వెంటనే.. ఈ చిత్రం సెట్స్ మీదకు వెళ్లనుంది.
